母親節剛剛過去，孝順仔女當然馬不停蹄，繼續準備父親節慶祝節目。有無爸爸鍾意品酒㗎呢？如果係，不如帶爸爸去特色酒吧飲翻杯，chill住享受家庭時光！
海明威主題 The Old Man
打開隱藏於鴨巴甸街暗巷中一道唔起眼嘅窄門，竟然係通往酒同海明威世界嘅通道。見到酒吧名唔難聯想起《老人與海》呢本小說，酒吧正正就係向海明威致敬。
The Old Man今年奪得香港酒吧第一位，無論酒嘅製法、使用嘅器材同創作意念都極為前衞。例如呢款以海明威回憶錄命名嘅雞尾酒A Movable Feast， 就以旋轉蒸發器將蜆肉、海藻、鹽、海水同伏特加，濃縮成液體後再以香料車厘茄、椰子、蠔葉等材料調配而成，飲落好香蠔味並帶海水鹹香。
相信鍾意睇書嘅爸爸都會想試下以味蕾品嘗文學嘅感覺。
神秘隱藏酒吧 Room 309
以神祕酒店房間為主題嘅Room 309位於The Pottinger 3樓一個角落，要進入309號房，必須去旁邊嘅餐廳The Envoy填好check-in表格再拎房卡，先可以拍卡進入酒吧。一推門入去，你就會入到一個放滿傳統文儀用品、感覺莊嚴又復古嘅空間。呢度主打「隱形雞尾酒」，配合酒吧神祕感。
呢杯Crystal Old Fashioned 以蒸餾方式將花生醬同波邦威士忌結合並變成透明，其花生味香濃，後勁帶木屑香同果香。
另一杯隱形雞尾酒Banana di Mana就以氈酒配香蕉花蜜同梳打水，調酒師以離心機將香蕉沉降物分離，提取出清澈嘅香蕉汁進行調配，其酒味唔算濃烈好易入口。
Translucent Toaster 係一杯將香烤葵花子注入龍舌蘭嘅雞尾酒，味道似咖央多士，有烤種麵包香蔓延。
小食方面，Tuna Tartare Filo Tart （白鯷魚多士） 同Parma Ham & Truffle Duo（ 意大利巴馬火腿及松露二重奏）鹹香可口，下酒一流。
英式庭園嘆酒新去處 The Leah
喺寛敞開揚嘅戶外庭園下用餐品酒，絕對係一個放鬆好主意。新開張嘅The Leah於銅鑼灣打造咗一片綠油油嘅戶外露台畀大家享受，為大家提供一系列國際品牌同本地手工啤酒，仲有特別設計嘅清新雞尾酒。
薄荷青瓜雞尾酒將清新解渴嘅青瓜混合朗姆酒，再加入薄荷，調成一杯易入口又清涼嘅雞尾酒。
經典雞尾酒Godfather將濃厚蘇格蘭威士忌同芳香杏仁甜酒混合，味道濃烈後勁帶微甜。
食物方面，呢度主打英倫風格comfort food，適合一家人一齊食，感覺好溫馨。款式有蘇格蘭流心蛋、威靈頓牛柳、蘑菇木耳核桃意大利飯等。
乒乓城內暢飲 Ping Pong 129 Gintoneria
講講下酒吧做咩講埋乒乓波？推開呢道乒乓城紅色大門，原來係一間地下酒吧！呢度主要飲琴通寧（Gin Tonic），選擇好豐富，例如可以加入檸檬皮、薰衣草棒、接骨木花、青瓜皮等。
Master's London以嚟自巴塞隆拿嘅氈酒配Fever Tree Indian 湯力水，味道帶橙香同草莓氣息；Sweet and fruitily 就用上苺類調配，味道酸甜清新，好易入口。
酒吧設計咁特別，帶爸爸嚟一定覺得好新鮮，仲有好多特別打卡位，嚟到可以喺「鍛鍊身體」霓虹燈前面影張全家福啊！
文：Kenna
相：Tom, Kenna
