早前開飯仔喺過江龍登陸！海港城3大新店預告都介紹過嘅Paper Moon，係米蘭十大必食餐廳之一，除咗因為蘇民峰、鄧達智等名人加持外，連遊客、當地居民都會去幫襯，並獲得不少好評！今次嚟香港開店，氣勢咁強勁，梗係要窺探一下Paper Moon有乜睇頭啦！

#1 270° 無敵大海景

餐廳位於尖沙咀海傍，座擁無遮擋嘅「全視線」海景，最啱就係國慶新年睇煙花！咁靚嘅海景，點少得露天座位呢？Paper Moon有接近2,000呎嘅室外陽台，感覺好舒服！唔講咁多，睇圖啦！

而飲品可試下幾款香港獨有嘅cocktail，例如以vodka、哈蜜瓜、西西里檸檬汁調成嘅(左)Cantaloupe Martini $98，又或者(右) Mandarin Spritz $98，用Aperol意大利苦橙酒、柑橘、梳打水及prosecco調配而成。

#2 1.4噸意大利薄餅焗爐

為咗能炮製出與米蘭總店同樣高水準嘅招牌pizza，Paper Moon 花咗6位數字，專程從米蘭購入重達1.4噸嘅Ambrogi薄餅焗爐，焗爐可同時烤製8個12吋薄餅架！聽講單單將呢個1.4噸薄餅焗爐運入去餐廳廚房就已經花咗不少人力物力，非常「揼本」！

先將麵糰搓成圓形並拋起，令麵糰分佈平均，然後喺麵糰上塗滿番茄醬。

灑埋芝士就可以放入焗爐，以220度高溫焗約5-6分鐘就可以出爐啦！

新鮮出爐嘅薄餅切好後就會馬上送到客人面前啦，開動！

#3 大獲好評嘅招牌意菜

能夠獲名人、遊客嘅青睞，菜式質素一定有番咁上下。齋聽上面嘅1.4噸薄餅焗爐就知，pizza肯定係Paper Moon招牌菜之一啦！

餐廳設有12款pizza選擇，我就推介Pizza Edi $178，有番茄、水牛芝士、辣牛肉腸等配料，麵糰鬆軟得嚟又有少許脆邊，味道帶點微辛而不過辣，再加上好味又邪惡嘅芝士以及酸酸番茄醬，令人好難停口！

另一款Pizza Porcini E Tartufo $228就以香氣取勝，因為有松露油嘅關係，pizza未上枱就已經聞到嗰陣松露香氣，再加埋口感清新嘅牛肝菌、火箭菜沙律，食落不覺油膩。

煙燻豬腩肉寬條麵 $168，全球Paper Moon店舖銷量第一嘅皇牌item，自家製嘅Pappardelle寬條麵好軟身，再加入醃製過嘅意大利Pancetta煙肉去增加口感，夾埋秘製番茄忌廉汁就perfect！

Tiramisu招牌意大利芝士餅 $98，面層灑上可可粉嘅忌廉好厚實，再食到濕潤嘅espresso手指餅蛋糕，令整個口腔都充滿「啡」味，甜度亦適中。最重要嘅係，食譜跟足米蘭總店，炮製出最正宗、不加烈酒嘅Tiramisu，難怪會成為Paper Moon 鎮店甜品之一。

其他菜式：

手工水牛芝士伴復古番茄 $178

海鮮意大利飯 $228

(左)士多啤梨千層酥餅 $88、(右)香橙焦糖布甸伴野莓 $88

Papermoon
地址：尖沙咀尖沙咀廣東道17號海港城海運大廈3樓OTE 301號舖

文：Joy