女生們注意，有獨角獸進佔上環一間cafe呀！講緊嘅係呢間cafe新登場嘅粉紅獨角獸下午茶呀，女生們都幾難抵抗呢個tea set嘅魅力：粉紅色、獨角獸，夠夢幻夠可愛，最啱影相！開飯仔率先為姊妹們試下呢個獨角獸下午茶，究竟有乜食？快睇！

(左)為新主題而特別添置嘅白色獨角獸，帶點純真嘅感覺。(右)仲有呢堆獨角獸cushion畀你慢慢影。

食過呢間cafe嘅下午茶都知，每款下午茶都會送你魔法咭5張。認識不同香薰精油之餘，仲可以抽下牌睇心情。

首先上枱嘅有薰衣草朱古力有機茶，亦即係會落雨嘅茶。喺熱茶上面擺放粉紅色棉花糖，利用熱茶嘅蒸氣將棉花糖融化，落入茶中，令「茶中一點甜」，視覺效果一流！

輪到主角出場啦！以粉紅色餐盤盛載住11款鹹甜小食，兼且有微黃燈光，加上少許仙氣，令人不斷舉機狂影！

首先吸引你目光嘅，應該係綻放仙氣嘅(左)金光閃閃獨角獸小盒子啦！打開發現，原來係兩粒松露朱古力嚟架，仲有好似迴旋木馬咁款嘅(右)獨角獸翻糖蛋白餅杯。

另有紅莓彩幻蛋糕、獨角獸奇蹟曲奇及繽紛獨角獸馬卡龍。

至於鹹食方面有：(左至右)煙三文魚餡餅、檸檬香草肉絲餡餅、香辣肉絲餡餅以及真純芝士餡餅，我最鍾意真純芝士餡餅，來自拉脫維亞嘅新鮮芝士質感好厚身，味道亦好rich。

香腸濃香芝士卷

有得食有得玩！

凡惠顧獨角獸下午茶，可以即場免費玩數碼彩繪美甲1次。彩繪設有3個款式，幫指甲扮完靚靚後仲有優惠券畀你拎走添！此外，只要你upload下午茶相片至Instagram以及Facebook，並加上hastag  #dkcuppatea #dkaromatherapy #不朽純真，再tag多3位朋友，就可免費玩扭蛋機1次，好運嘅話仲可以抽到獨角獸小飾物架！

「不朽純真」下午茶
供應期：9月22日起至12月底
價錢：$298/位
註：最少兩位起，另設加一服務費

DK Cuppa Tea 
地址: 上環新街市街19號地舖

文：Joy