溶在心的甜 Häagen-Dazs
朱古力加雪糕一直都係一眾囡囡嘅至愛，Häagen-Dazs新出嘅幾款多層雪糕蛋糕，唔止溶在口，直情係溶埋佢哋……個心呀！「濃情酒意」仿懷舊古董紅酒盒嘅設計，喺面層灑上牛奶朱古力片，中層係比利時朱古力加酒漬紅莓同曲奇呍呢嗱雪糕，最底嗰層就係杏仁脆底，很想吃吧？
「愛情守護神」就係由黑朱古力脆皮包住黑朱古力杏仁雪糕，再加朱古力碎同焦糖杏仁，再再再配埋呍呢嗱雪糕同開心果脆底，聽到都覺得巧開心呀！仲有一款係白朱古力脆皮搭士多啤梨、比利時朱古力雪糕搭原味海綿蛋糕，極具口感。
留得住的甜 Crabtree & Evelyn
要過一個英式聖誕其實唔難，Crabtree & Evelyn 同往年一樣，都會推出一系列嘅英式牛油曲奇，傳統之中又帶有少少新鮮感。牛油味重就理所當然啦，之但係又點少得聖誕節最佳拍檔：朱古力呢？黑朱古力榛子曲奇同今年新味海鹽焦糖朱古力曲奇絕對係不二之選，視乎你想要少少甜定多多甜啦。個英式禮罐咁靚，送禮又得體，食完留嚟自用一樣咁正正子。
電話： 2264 4848
追得到的甜 Jean-Paul Hévin
聖誕節就是要追星吧？我指法國朱古力大師Jean-Paul Hévin製嘅聖誕限定法式杏仁餅星星呀！呢粒星星係用巴西嘅可可豆造㗎，加埋低糖嘅杏仁餅、混入埋咖啡同香料，嗯，甜得嚟又唔會太濃。仲有今年全新推出嘅聖誕夾心朱古力「電光火石」，同樣夾雜住甘甘der嘅咖啡同甜甜der朱古力，又甘又甜，係愛嘅味道呀！呢份愛，喺尖沙咀海港城特設嘅專賣店度就可以搵到喇，仲有其他多款口味嘅朱古力㗎。
電話：2735-3268
滿滿的都是甜 倚窗閣（九龍酒店）
朱古力點止甜品咁簡單？今年聖誕，朱古力將會喺九龍酒店倚窗閣老是常出現，連主菜都會食得到。「焦糖黑朱古力咖啡煎鴨肝」用上微苦嘅72% Valrhona黑朱古力配比利時鴨肝，口味同口感完美融合。另外，「朱古力燒烤醬慢煮極黑豬腩肉」就以各式蔬菜連同豬腩肉一齊慢煮，再加入栗子、百里香、意大利黑醋，同埋重點：黑朱古力，絕對係朱古力控必試之選！喺餐廳嘅自助餐桌上，同時都可以搵到其他甜品系，例如薑餅人呀、波板糖呀、手杖糖呀等等經典糖果元素喺各式嘅食物入面，實行成餐由頭甜到落尾。
電話：2734 3803
無孔不入的甜 尚廚（香港九龍東皇冠假日酒店）
一入香港九龍東皇冠假日酒店嘅酒店，就會見到一棵8呎高、以金、銀、白作主色調嘅巨型朱古力波波聖誕樹，每粒朱古力波波直徑有成5吋，總共有350粒呀。然後再入埋去尚廚餐廳食埋由法國CHOCOLATERIE DE L’OPÉRA、瑞士經典百年朱古力FREY、新加坡殿堂朱古力Aalst Chocolate三大朱古力品牌攜手合作製嘅朱古力系甜食：烤羊肉朱古力曲奇配百里香汁、Opera32%焦糖白朱古力慕斯蛋糕、Aalst 34%法式牛奶朱古力忌廉杯配香茅果凍、Frey72%純黑朱古力慕斯蛋糕配威廉梨，嗰份甜絕對係由外甜到入內再甜返到外呀，嗚呀！
電話：3983 0688
下午茶的甜 Woobar（Ｗ酒店）
邊個話聖誕大餐得夜晚先有得食？開飯仔話你聽，輕輕咁歎個下午茶都得！朱古力甜品嚟講，W酒店嘅Woobar有款「覆盆子棒」介紹返，廚師將朱古力筒同奧利奧脆餅，仲有覆盆子配埋一齊，再將個筒反轉再反轉，夠晒新鮮感。至於由朱古力慕斯、朱古力同埋朱古力珠組成嘅脆皮朱古力木頭蛋糕，一啖咬落去，嗯，好有朱古力味呀，仲係有幾種層次嗰隻~係吸引嘅。
電話：3717 2299
隨時接收最新資訊
讚好OpenRice專頁！
關鍵字
聖誕
朱古力
甜蜜
酒店
甜品
複製到剪貼簿