每逢糧尾都好不知所措，唔知食咩個荷包先唔會痛呢？今次開飯仔就嚟到灣仔，帶各位灣仔打工仔食好西之餘，又唔使怕傷害到個荷包！糧尾啫，又有咩好怕喎~
餃咁多口味 北方餃子源
圖﹕呢間餃子店屹立灣仔十幾年，可以話係灣仔打工仔飯堂呀！佢哋嘅水餃麵40蚊左右就有交易，選擇超過10種，蒸餃又有煎餃又有，皮薄餡足，清清地有白菜豬肉餃麵、翠玉瓜豬肉餃麵，想有特色啲就不妨試下京蔥羊肉餃麵，唔會太羶，適合香港人嘅口味！
良心香港麵食 富記麵家
圖﹕花太郎
喺呢間麵店就可以食到最普通，但又買少見少嘅香港味啦，好似墨丸河、牛腩河、紫菜四寶河等等。碗碗嘅份量都好多下。自家手打墨丸足料又彈牙。特別推介牛盛薈河，一碗有齊牛肚、牛丸、牛筋同牛腩，煮得入味而且夠晒腍！
大大件燒味 大慶燒味飯店
圖﹕呢間燒味店勝在價錢公道，燒味又夠足料，大大件，完全唔欺場。必食叉燒呀，口感軟腍，肥瘦適中~ 嗌個叉燒飯、叉雞飯，都係50蚊有找，而且就算係男人都一定可以食飽！
平民港式漢堡 樂景快餐店
圖﹕邊個話糧尾食漢堡包，就一定要去M記呀？呢間細細間嘅小食店，位唔多，但選擇就夠晒多！粉麵飯$30零蚊咋都係，漢堡包仲抵，10幾蚊就食到個！而且仲要係即叫即做喎，烘過嘅麵包帶有微脆口感，手剁漢堡扒口感厚實，仲好juicy，絕對係糧尾天堂！芝士控記住要揀芝士蛋漢堡喇，塊芝士半溶的啊。
熱辣辣咖喱 新景園咖喱小廚
圖﹕灣仔區食飯不嬲都唔平，呢度午市飯盒50蚊有找，仲要大大盒，飯多餸多都算係咁啦。呢度特別出名係食咖喱，咖喱汁微辣但又帶點香甜，撈飯食一流！咖喱汁係另上嘅，自己鍾意淋幾多就淋幾多啦，反正就係惹味開胃。特別推介咖喱豬扒飯，豬扒炸得酥脆，浸晒落咖喱度，都唔會覺腍呀！
文﹕Kiko
