紅磡區向來都係平民美食天堂，仲有唔少出名嘅舖頭喺度紮根多年。小店選擇多，價錢抵。簡直就係「長期糧尾」嘅天堂⋯係飯堂至啱！而以下呢個平價飯堂地圖，無論係附近嘅打工仔，定仲係學生嘅poly仔，都一樣啱使！
大大碗上海麵 滄浪亭
呢度最吸引嘅就係平均$40-50一款、大大碗、好抵食嘅上海麵！作為招牌菜嘅香酥大排同香酥雞麵就最多人嗌。呢兩樣炸嘢都做到外面酥脆乾身，入面就保留嫩滑肉汁。而且麵嘅份量夠大份，正！不過店入面只有五張細枱左右，最多都係容納到20個人，Lunch可能要爭位啦～
重慶風味直送 一碗小麵
重慶風味直送 一碗小麵
近期川菜真係好紅！幾乎個個都變成麻辣控。呢間正正就係專做經典四川重慶小麵，而且款式好多，有啲出面都好少見到。好似涼拌雜錦豆花米線、乾撈碗豆雜醬麵咁。雖然有網友話麵嘅份量都好夠，但如果真係無飯不歡嘅朋友可以叫個小菜，例如蒜泥白肉咁，加多幾蚊有碗白飯，都係around ＄40幾咋。
平價街頭韓食店 韓點
平價韓式料理，主做外賣，舖頭嘅位唔多，但反而好有韓國街頭小店feel。咁多款飯、麵都＄40多啲啲嘅呢個價位。細食嘅朋友叫小食類嘅Kimbap都飽嘅話仲平啲添！仲有韓式拌飯，多菜少肉，食晒成碗都唔驚肥。同埋韓國水冷麵，夏天冇咩胃口嚟食就最啱！
低調台式小食店 魯一式
呢間台式小食店，開咗冇話好耐但已經幾有口碑。魯肉飯都係十零廿蚊，勁抵食，一碗可以救起你份糧。仲有唔少人大讚滷水三寶（特別係隻蛋）同今期流行嘅魯肉皺皮腸好食。皺皮腸係即叫即整，新鮮熱辣，份量好多，有魯肉、生菜、芽菜、菜脯，相信呢份腸粉都可以令大家有餐溫飽。
抵食意粉焗飯 薄餅怪獸
呢一間真係平靚正pizza舖。 不過最多人讚嘅唔係pizza反而係炸雞， 話咬落去好多肉汁， 好juicy。仲有賣相高質嘅平價焗飯、意粉套餐，＄40左右，可能仲平過食茶記，所以有啲人都當呢度係飯堂。仲要有薯條跟，又可以配一件炸雞，鍾意開心肥仔餐就fat fat了。
文：Yanny