話咁快又到咗呢個moment啦~無錯呀！又糧尾啦！講到打工仔最多嘅地區，又點可以唔介紹觀塘呢？觀塘出名office多，餐廳當然都唔少啦，但食嚟食去都係又貴又頹嘅荼記？想食好啲又唔想太傷銀包，開飯仔有好推介。
超抵地道星馬菜 拿督星馬大飯店
觀塘熟食中心出名多又抵又高汁嘅餐廳，一向係打工仔嘅糧尾福地。呢間星馬菜嘅款式夠晒地道，重點係一碗飯麵50蚊有找，而且大大碟，唔使驚餓親冇力返工。特別推介佢哋嘅「大細腳黑鼓油乾撈麵」，「大細腳」即係豬腳同雞腳，兩者都炆到勁腍，咬落去成口都係骨膠原﹗夾埋甜甜地嘅黑鼓油，勁有東南亞風味。
簡單好食蛋牛治 SHY Dance Cafe
夏天太熱冇晒胃口食嘢？咁不如食light啲食個蛋牛治啦﹗呢度嘅招牌蛋牛治夠晒足料，多到要喺兩塊麵包中跌出嚟咁。而且蛋牛治入面嘅免治牛肉堅持用人手剁，唔用機攪，咬落特別有口感，同普通茶記完全兩個level呀﹗叫個蛋牛治餐，加埋杯咖啡奶荼，30蚊有找，糧尾啱晒！
經濟實惠車仔麵 來多碗車仔麵
呢間車仔麵出晒名抵食，視乎你叫幾多餸啦，一碗麵通常$30-$50就食到，就算叫個五餸一麵50蚊都唔使，而且啲料大大嚿，絕無欺場。魷魚係呢度嘅「鎮店之寶」，爽口彈牙，吸晒湯汁非常入味。夏天想醒醒胃，不妨加埋佢哋嘅秘製辣醬，帶淡淡嘅蒜香，唔會得個辣字！
大大份漢堡 My Burger
糧尾都唔一定要搵茶記食嘅，想食個burger都得。呢間舖專賣美式漢堡，大大份，勁多料，50蚊到啦，唔算好尾嘅糧尾都仲可以食得到。特別推介佢哋嘅經典牛肉漢堡，牛肉漢堡扒非常厚身，連埋其他配料一啖咬落去，哇~真係超juicy﹗大滿足呀！
非一般雲南米線 雲南啊老表黑山羊湯鍋米線
改個咁長嘅名，無非都係想同各位老表講，呢間舖要食雲南米線之外，仲要食埋佢哋嘅黑山羊羊肉。黑山羊羊肉煮得滑滑嫩嫩，好有羊味，絕對係羊迷嘅大愛！唔好羊肉嘅，可以試下牛腩米線，牛腩腍身又夠肉汁。大大碗米線，最平$40都可以埋單。
文﹕Kiko