個個都慳錢，唔通個個都想慳錢咩？慳錢無非都係因為糧尾啫……唔好咁快頹住先！今次鰂魚涌嘅打工仔有口福啦~想慳住個荷包，又想食好西，開飯仔有好介紹，港式泰式越式都有添啊~
台灣古早蛋餅 小倆口台式漢堡蛋餅專賣店
圖﹕soya1314
呢間台式小店由台灣夫妻開設，提供台灣最地道嘅蛋餅，裡面可以加肉鬆、粟米、芝士等。即叫即製，好足料下，啲料多到爆晒出嚟，芝士仲有微微拉絲嘅狀態添，$50有找。當然想再平啲，$25就有份地瓜煎餅。
滑蛋叉燒飯 旺記冰室
圖﹕followmyfoodstep_ 、FiFiFiFaFa
呢間冰室，糧唔糧尾都好多人，幾乎lunchtime去親都要排隊。40零蚊食到個鮑魚火腿絲通粉兼有炒滑蛋同多士加多杯嘢飲，係豐富嘅。但如果你手頭唔算太緊，就梗係食佢嘅滑蛋叉燒飯啦，流住蛋汁嘅滑蛋，仲有自家醃製嘅叉燒，灑埋點點蔥花，幾香口。
大大碟越南菜 大叻越南牛肉粉餐廳
圖﹕鍾意食越南菜嘅打工仔，呢度啲嘢喺同區嚟講，算係大件夾抵食啊。特別推薦呢度嘅炭燒香茅雞扒飯，大大件雞扒，完全唔慳料，撈埋啲蔥油，仲帶有陣陣炭烤香味，好吸引。
外賣海南雞 營豐海南雞專門店
圖﹕cowwoc
唔好諗住外賣就一定好頹啦~呢間舖淨係得外賣飯盒，不設堂食。最平30幾蚊就食到個lunch，當中最好賣嘅當然係招牌脫骨海南雞飯啦！海南雞全部去晒骨，切到細細件，可以一啖一嚿，再加埋好有雞油味嘅油飯，糧尾一樣食得爽~
地道泰味飯盒 Thai Kitchen
圖﹕呢間小店同樣只做外賣，$50左右就有一個「泰式飯盒」啦！菜式走簡單風，一啲都唔花巧，就好似佢哋嘅燒豬頸肉飯咁，大大件嘅豬頸肉上再鋪蔥油，撈飯一流~而且仲包埋自家煲例湯，夠晒健康啦！
文﹕Kiko