香港最近興起素食熱潮，有好多餐廳都推出素食Buffet，無論中式西式都應有盡有，而家又多一個選擇啦！中環蘇豪區最近開咗一間樓上素食西餐廳，去到樓下要先禁門鐘，上到去好寧靜，同出面環境截然不同。餐廳所有食物都無海鮮無蛋無奶無葱蒜，強調百分百全素！
老闆已經茹素25年，年半前喺深圳開咗一間fine dining嘅素食餐廳。不過佢一直都想喺自己成長嘅香港到推廣素食，佢認為坊間嘅素菜一般比較油膩，而且環境都較迫，所以就決定喺香港開一間價錢合理、環境就舒服嘅素食餐廳。大廚有30年煮西餐經驗，有九成半嘅菜式都唔會素肉代替，醬汁方面都盡量自己調較，希望令平時唔食素嘅人會話：「原來素菜都可以咁好食！」
Vegan Crab Burger ($138)，用雞脾菇代替蟹肉，將雞脾菇撕成一條條再拎去炸，配上咖哩＋純素蛋黃醬、青芒果同菜絲，一啲都唔會覺得漏，而且雞脾菇較脆口，食落更加過癮！
更多【新店直擊】： |
Cauliflower cake ($88)，薯餅炸到外脆內軟，入面加咗椰菜花，令口感更豐富！Vegan Tuna Tartar ($98)，用素吞拿魚、牛油果、芒果、蕃茄同藜麥製成嘅沙律，素吞拿魚用蒟蒻代替，外貌同味道都同真正吞拿魚刺身勁似！
Baked Portobello Mushroom ($128)，大啡菇菇味濃，菇中間放咗核桃碎，令味道無咁單調。底下配有薯餅同青蘋果，特別推介薯餅，同平時食開成塊拎去炸嘅唔同，大廚將薯餅切成絲後再拎去煎，更加爽脆！
Four Season Pizza ($138)，一個pizza 有4隻味，分別係蕃茄、茄子、南瓜同埋最特別嘅朝鮮薊，朝鮮薊係一種西餐常用嘅材料，質感有啲似菇類，軟中帶脆。
另外所有用到奶類嘅飲品，如咖啡同奶茶都係用純素燕麥奶去沖。中意飲酒嘅人都無有怕，老闆特別引入素酒，素酒即係喺生產同釀製過程中無加入任何動物成份，食全素嘅人都可以放心飲，好貼心！
老闆仲話餐廳無最低消費同限時，希望食客可以喺一個最Relax嘅環境下享受吓，平時無咩機會食素菜，襯依個機會去健康下啦！
地址:中環蘇豪伊利近街28號1樓
文、相、片：Yanica