老實講，自問非常著重衛生環境，或者想食超豐盛九大簋嘅話，咁你應該就唔洗睇落去喇。牛頭角街市熟食中心呢度全部都係非常街坊嘅嘢食：豬扒麵、大排檔小炒、點心、粥麵，最特別嘅都係泰國菜啫。但呢度嘅賣點一個字，抵！
重口味豬扒公仔麵 北記咖啡奶茶
又嚟溫馨提示先，呢碗豬扒公仔麵係就係唔健康兼重口味㗎啦。醃到入味嘅豬扒炸到外脆內嫩後剪成一條條，夾埋公仔麵同重鹹味嘅湯底，想再香啲話可以落埋唔太辣但夠哂香嘅辣椒醬。炸牛扒一樣出色，記得試埋佢地嘅瓦煲咖啡奶茶，別有一番風味。
大大碟泰國菜 泰味屋(堅記美食)
呢間泰國菜比起其他檔口嚟講歷史唔算耐，但就已經係唔少附近街坊嘅心頭好。無他嘅，水準平均仲要分量夠多吖嘛。酸辣鳳爪沙律同豬肉碎生菜包夠辣最啱醒胃用，炸蝦餅同串燒香口又啖啖肉，另外泰式炒金邊粉同咖喱炒蟹等都係推介菜式。
鑊氣送酒小炒 牛下合利小廚
圖：手機上傳
睇個餐廳名應該都估到，呢檔係嚟自牛頭角下村九座嘅大牌檔，進駐熟食中心後一樣係供應各款小菜、打冷同炒粉麵飯，最啱送啤酒。例如香口嘅薯粒牛柳粒、香辣嘅麻辣皮蛋、入味嘅潮州生醃鰤魽等。冬天仲會有煲仔飯食！
更多【熟食中心尋寶】： |
一大班人最啱食 新南苑大排檔
圖：carykof
建議起碼四個人或以上先嚟呢檔，因為每碟都分量十足，叫多幾個朋友先試到多啲款吖嘛。必點脆皮鹹豬手，師傅已經幫你起骨切片，皮脆肉嫩，伴碟嘅即炸蝦片亦記得要趁熱食。另外鹵水拼盤、紅燒乳鴿、炸蠔餅同薑蔥炒蟹等都值得一試。
老友記最愛手工點心 龍泉茶樓
圖：繳費玲
夜晚嚟食小炒，朝早嚟一樣有手工點心！同大部分茶樓唔同，呢度嘅點心係老闆凌晨自己整嘅而唔係用來貨。用料唔算特別靚，但一嚟即日整點都係新鮮啲，二嚟呢份心機值得支持嘅。唔少公公婆婆都會一早嚟食返盅蒸飯加點心。
超值足料粥店 鑑記粥品
圖：cten
十幾蚊一碗粥喺邊度搵？呢檔粥店嘅出品仲要碗碗都足料！艇仔粥、牛肉粥、皮蛋瘦肉粥、魚片粥等粥底香綿而且配料夠多，怕唔夠飽嘅話可以嗌多碟炒麵，勝在唔會太油，落埋麻醬甜醬同白芝麻一齊食夠香口。
文：Cathy