上facebook不時見到細味人生呢間網店，身邊唔少朋友都食過讚好，最近呢間網店終於喺尖沙咀開設門市，可以即時買走喇！舖頭不大但有齊全部12款產品，包括酒醉同麻辣兩大系列。舖頭仲有得試味，覺得好食先至買！
老闆Cassandra稱，所有產品都係香港製造，工場設於觀塘。網店開業唔夠一年，幾位店主專誠去上海、四川學習，只選靚食材，好似雲耳用老鼠耳，海鮮好似鮑魚、蝦同花螺係用游水貨，凍肉就會揀最靚級數。
預備工夫相當多，先處理乾淨食材，仲要去衣去腸去毛、吐沙、剪蝦腳等，之後先至煮製。酒醉就用幾款黃酒同白酒浸幾日，至於麻辣系列就用自家炒成嘅麻辣醬，撈勻即可。入樽後確保入味先出貨。
酒醉鮮海蝦 ＄280/500g
酒醉花螺 ＄240/570克
海鮮得酒醉口味，酒醉鮑魚一樽有一斤，約7至8隻，都幾大隻架。選用鮮澳洲翡翠鮑魚，已經去掉內臟。酒味香但唔過濃，仲食得到鮑魚味，而且腍身唔老。花螺同大蝦同樣食到鮮味，唔會被酒味蓋過。
酒醉鮮鮑魚 ＄680/1,100g
最受歡迎嘅鴨舌有齊兩款口味，個人鍾意麻辣味多啲。麻辣先有一陣微微麻香，食完之後辣味先慢慢滲出。匈牙利鴨舌大條，厚肉又夠滑，麻辣好入味，會食唔停口架。
酒醉及麻辣鴨舌 ＄160/ 340g
新產品就有麻辣鵝腎，比鴨腎更大粒更厚肉，角切食落啖啖肉帶甘香，但就唔夠入味。麻辣豬耳切得幼細好脆口，其他產品仲有酒醉豬手、雞蛋、麻辣牛舌、雲耳。
麻辣鵝腎 ＄120，麻辣豬耳 ＄80/300g
酒醉豬手 $100/500g
所有食品都冇加防腐劑，放入雪櫃都唔擺得耐架，3日至7日內最佳，但放心，好快就會忍唔住食晒。
地址：尖沙咀加拿芬道8-12號地下A2號鋪
電話：2771 0030
營業時間：11am-9pm
文、相、片：Perrins