肉食獸又要出動喇！嚟自紐約嘅著名扒房嚟咗香港開分店呀！

唔好咁心急，一嚟就淨係食扒。呢度嘅海鮮都做得唔錯，可以考慮嗌個海鮮拼盤，段人頭計嘅，每人有半隻龍蝦、2隻大蝦、同埋新鮮拆殼蟹肉，全部都幾爽甜呀，但份量幾多下，食完都飽咗一半。

香煎蟹餅亦係另一個頭盤嘅選擇，蟹肉鮮甜，外層煎得香脆。相對冇咁大份，不過啖啖都係肉，都唔少嘢呀。

想fresh啲，減低啲罪惡感嘅就可以叫沙律。呢個招牌沙律，七彩顏色，搭配有煙肉有蝦。

登登登登。主角出場喇。呢度嘅牛係採用美國認證嘅黑安格斯牛肉，由美國空運到港，再喺餐廳自設嘅恆溫熟成室乾式熟成28日，提升牛肉嘅嫩度、風味同肉汁。經過高溫炙烤之後再配上簡單嘅調味，按客人要求嘅熟度煮好。上枱嗰陣，仲聽到滋滋聲，同埋啲牛油仲有啲泡泡咁，未食就已經聞到牛油香味。

呢塊Porterhouse已經切好一件件，侍應仲會幫食客分埋碟，邊位煎到有啲脆添，不過牛肉略嫌唔夠嫩，牛肉味如果可以再濃啲啲就好喇。另外有德國式焗薯、忌廉菠菜等等嘅配菜可以追加。

食到最後，如果你另一個胃仲有胃，呢度都有唔少蛋糕揀啊。經典款如紐約芝士蛋糕，或者清新款如青檸批都有啊。

Wolfgang's Steakhouse Hong Kong
地址：中環都爹利街六號印刷行1樓

文、相：Kar