色彩繽紛嘅糖果，唔單止小朋友，其實大人都一樣鍾意食！呢個嚟自美國，主打「為大人而設嘅奢華糖果」概念嘅品牌就即將登陸尖沙咀。糖果牆加上藍白主調，視覺效果先贏。而且口味多元化，有人氣香檳小熊軟糖，大人口味威士忌酒心朱古力，同香港限定嘅禮盒等緊你！
 

Sugarfina首間海外分店選址尖沙咀海港城，見到呢個藍白主調同透明糖果盒覺得好眼熟？皆因你可以喺Sammi鄭秀文，同阿Sa蔡卓妍等明星嘅Instagram動態裡面見過！品牌嚟自美國洛杉磯比華利山，而尖沙咀店就將過百款糖果中嘅57款帶到香港。
 

Hello Hong Kong! Candy Bento Box（$258）

雖然因為研發需時暫時未有香港限定口味，但就有呢款充滿特色嘅電車造型禮盒補返數。裡面有Rosé All Day Bears 玫瑰香檳小熊軟糖，同Fuji Apple Caramel富士蘋果焦糖糖果。特別係前者喺美國推出嘅時候，曾經創下待購名單超過18,000人嘅記錄！
 

Champagen Bears（Small Cube）（$88）（Large Cube $198）

而招牌香檳小熊軟糖唔單止有吸引嘅粉紅色賣相，而且用Brut同Rosé香檳製作，既有香檳嘅乾爽餘韻，亦帶玫瑰芳香。而且無脂肪、無人造色素同無麩質。
 

But First, Rosé Roses（左Small Cube $88，右Large Cube $198）

鍾意玫瑰香檳嘅話，就唔可以錯過呢款加入玫瑰香檳製作，而且特別整成立體玫瑰花形狀嘅軟糖！味道香而唔會過於甜膩。
 

Single Malt Scotch Cordials-Cask Strength（Small Cube $88）

唔單止軟糖，朱古力都有大人口味！香脆嘅朱古力外殼，包住嘅係蘇格蘭威士忌呀！Cask Strength指嘅係未經加工，保持威士忌出桶時強度嘅原酒，可以保留原始風味，而且酒精濃度都比較高，小心食到醉呀。
 

Dark Chocolate Sea Salt Caramels（Small Cube $78）

美國人氣No.1嘅朱古力，鹹甜平衡有致嘅海鹽焦糖配上黑朱古力，口感柔滑而且味道層次分明，相當易入口而有驚喜。
 

DYO Bento Box（3件裝 $288，4件裝 $388，8件裝 $688）

（中）Candy Trunk（20盒裝 $1980）

如果想送禮嘅話，就可以揀Bento Box自選禮盒，有品牌藍白配色，亦有寫上特別字句嘅禮盒選擇，可以自由配搭唔同軟糖同朱古力。
 

 

Sugarfina Faves Candy Bento Box（8件裝 $688）

Sweet and Sparkling Candy Bento Box（3件裝 $288）

Vice Collection Candy Bento Box（3件裝 $288）

自問有選擇恐懼症嘅朋友，亦可以揀主題禮盒。Sugarfina Faves係品牌最受歡迎嘅口味，Sweet and Sparkling顧名思義即係以甜美閃亮為題，會有香檳同酒香糖果，Vice Collection就係專為男士而設，以醇厚酒香同香濃口味為主。
 

分店每日都會安排一款軟糖同一款朱古力畀大家試食，想搵心水口味嘅話不妨留意下。開飯仔幫大家問過，尖沙咀店之後有機會推出香港限定口味嘅糖果，而且然後亦會將品牌過百款糖果逐漸引入，值得期待！
 

Sugarfina
尖沙咀廣東道3-27號海港城港威商場3樓3327號舖

文、相、片：Cathy