自問係老夫子粉絲嘅朋友，有冇去過太子探佢先？佢今日喺元朗開多間分店添呀，門口同樣都係有老夫子同大蕃薯嘅一比一高人像公仔迎賓、打卡，舖面裝修好似同成班老友記一齊搭電車咁，而食物方面亦有此店限定嘅新菜式，比起本店仲多埋早餐嘅選擇添。

一入餐廳就即刻進入咗老夫子世界，由天花板到牆身到枱枱櫈櫈全部都係老夫子同佢嘅朋友sss，連帶本menu都係好鬼靚。稍為有睇過《老夫子》嘅朋友，都會知道每篇四格漫畫多數都係以四子成語為題，呢度嘅推介菜式都係一樣，好似「五花八門」咁，就係講緊美式雜扒嘞。一碟鐵板有齊雞扒豬扒同牛扒，可以揀紅酒燒汁、蒜蓉汁或者黑椒汁，都幾豐富，lunch嚟鋸個扒都唔係好過份啫。

「呆若木雞」同「對牛彈琴」都係新設嘅菜式嚟。前者即係海南雞油飯，仲要去晒骨嘅添；後者就係和風牛柳炒飯及田園沙律，個汁做得都幾香口。

另外，爐燒原隻嚤囉雞飯都好吸引，真係成隻雞咁上碟，應該要搵朋友一齊開心些牙先食得晒。

新菜式連同舊菜式總共有成100款咁多，係要花多少少時間先落到單嘅。對西多士情有獨鍾意嘅朋友，有「小巧玲瓏」一口西多配雪糕，而且唔係淨得下午茶時段先有供應，幾時口痕想毒一毒都得。

當然唔少得本店主打飲品「膽大包天」啦，忌廉溝鮮奶呀。棉花糖大大嚿雲咁喺杯鮮奶上面，再親手將啲忌廉倒落去，睇住啲棉花糖慢慢咁溶化，的確係幾治癒。

老夫子餐館
地址：元朗朗日路8號形點二期1樓A101號舖

文、相：Kar