平時鍾意流連甜品網店嘅朋友，應該都對呢間人氣曲奇網店Cookie Vission唔陌生！原來網店最近已經悄悄於寧靜嘅大坑開設實體店，創辦人Winnie Pang話想同更多人分享自己對烘焙嘅熱愛，而且始終覺得做網店、客人收到嘅曲奇一定唔係最新鮮，因為希望客人食到最新鮮出爐嘅曲奇，所以就開實體店令到更多人試到佢嘅作品。
店舖曲奇特色在於每一塊都足足有150g重量，而且口味方面好多元化，每日供應八至十款，天天不同，每月都會推出新味。另外自行調配食材比例，同坊間曲奇相比，每一塊都外脆內軟，比較濕潤，大部份口味都有流心內餡！
Pookie of the day (Banana foster with coffee custard cream) $55
呢款自家原創嘅甜品「Pookie」出面真係食唔到喇，於曲奇表面加上一層類似牛角酥嘅焦糖酥皮，外酥內軟，味道層次更加豐富。口味方面都係每日唔同，開飯仔拍攝當日係香蕉冧酒咖啡吉士醬，咖啡嘅甘苦中和咗香蕉及吉士嘅甜味，帶淡淡冧酒香，配埋酥脆外皮絕對係一個出色嘅甜品。
Cinnamon toast crunch $40
最近先推出嘅新口味，肉桂味曲奇加入牛奶朱古力醬做餡，面層再加上Cinnamon crumble令味道及口感更豐富，一切開仲會流心～
Macha macadamia nuts $50
店主推介話最受客人歡迎嘅抹茶口味，選用日本抹茶粉，抹茶味香濃，切開同樣有抹茶流心內餡，撒上白朱古力及澳洲堅果，無論口感定味道都好rich。
Key Lime Pie $40
青檸口味靈感來自美國傳統Key Lime Pie，將餡料放於中間，味道酸酸甜甜，適合唔鍾意太甜嘅朋友。
Apple Pie $50
曲奇餡料係自家製肉桂蘋果，肉桂味都幾突出，加入燕麥葡萄乾增添口感，面層仲有經典格子酥皮，好香濃～
地址: 大坑浣紗街6號全興樓地舖
文、相: Yanica