近年多咗餐廳主打越南牛河，呢間就搵嚟越南華僑名廚監修。從湯底、河粉到牛肉嘅選擇都一絲不苟，唔少材料例如香料更從越南直送，希望將正宗越南風味帶到嚟香港。另一特點係湯河粉嘅生牛肉可以自己揀部位，想食牛柳定牛肩胛你話事！
一牛越南粉專門店位於上環，由越南華僑朱廣南師傅主理，朱師傅喺美國任職餐廳總廚嘅時候先後為美國總統列根同老布殊下廚，後來返到越南胡志明市擔任唔同餐廳嘅顧問。
招牌火車頭河粉（$88）
招牌火車頭配料最豐富，有齊生牛肉、牛腩、牛腱、牛筋同牛丸。生牛肉片選用牛頸脊，脂肪較少而且肉質結實，枱上面亦有甜醬同是拉差醬畀大家按自己口味點嚟食。牛腩鬆化甘香，牛腱口感Q彈，牛筋軟腍入味，手打牛丸亦相當彈牙。
值得一提嘅係湯底係每日用30公斤牛脊骨，加上10公斤豬骨同雞骨，越南直送香料包括八角、小茴、桂皮等熬製五個鐘而成。特別用牛脊骨代替常見嘅筒骨，因為脊骨帶肉同軟骨，令湯底更香濃而且無咁油膩。而河粉亦喺香港特別搵到一間由金邊人開設嘅粉麵廠，做出同越南河粉相似嘅鮮河粉，比一般嘅更薄身更幼滑，略嫌依然唔夠越南河粉煙韌。
生熟牛肉河粉（$78，升級牛肩胛+$8）
所有湯河粉嘅生牛肉都可以自己揀部位，包括美國頂級牛柳、牛肩胛，或者牛小排。餐廳特別推介嘅係牛肩胛，脂肪分佈平均，有油花香口感亦嫩滑！配搭清澈香甜嘅牛骨湯底就最啱。每碗牛肉河粉仲會配芽菜、金不換、紫洋蔥同鵝蒂（越南芫荽）。
越式春卷（$38/4件）
湯河之外餐廳亦有一系列經典越式小食，當然唔少得大家食開嘅春卷啦。春卷裡面有甘筍、沙葛、木耳、肉碎、雞蛋等，特別「武器」係蟹肉同皮蛋！前者令春卷增添鮮味，後者係跟返越南南部傳統做法。餡料口感同味道層次豐富之餘，春卷皮亦炸得非常香脆，點埋用越南魚露製作嘅醬汁食一流。
更多【新店直擊】： |
牙車快（$28）
比起春卷，呢碟牙車快大家可能比較少接觸，其實越南話裡面牙係雞、車快係沙律，其實即係雞肉椰菜沙律，係越南傳統菜式之一。味道清爽嘅雞肉配搭爽脆嘅椰菜絲，味道就主要嚟自沙律汁，同樣用越南魚露，加醋、辣椒等調配而成，酸酸辣辣好開胃。
越南咖啡（熱）（$20）
咖啡同樣嚟自越南，用越南咖啡專用嘅滴啲壺上枱，杯底已經加咗煉奶，咖啡滴漏好之後搞勻就飲得。用嘅係加牛油炒嘅傳統越南咖啡豆，味道濃厚香醇。
一牛越南粉專門店
地址：上環文咸東街49號地舖
文、相、片：Cathy