由藝人舒淇創立嘅KiKi麵相信大家未食過都聽過，最近實體店終於由台灣開到香港啦！除咗供應台灣店嘅招牌菜式外，仲會有香港ifc店限定嘅兩款麵食同飲品，KiKi麵嘅fans準備好未？

鮑魚花膠雞湯麵($138)

兩款限定麵食都係由香港米芝蓮三星中廚歐國強師傅設計，鮑魚花膠雞湯麵嘅雞湯係加咗豬骨熬製4-6小時，味道豐富、濃郁而清爽，再配埋鮑魚絲及花膠絲。負責人話考慮到附近較多上班族同OL，飲返碗健康雞湯就啱晒～

KiKi抄手拌麵($98)

KiKi抄手拌麵同樣係ifc店先有，抄手加入雪菜、白菜及豬肉，味道就較清淡，靠歐師傅嘅秘製醬汁帶起成個味道。順帶一提，店內所有拌麵都會加入薑蒜水及麵醬油提升味道。

蒼蠅頭拌麵($98)

另外店內都有供應台灣招牌麵食，蒼蠅頭拌麵加入台灣豆豉、豬肉碎及韭菜，台灣豆豉味道就甘甜啲，唔會太鹹，成碗麵鹹鹹香香，食落都好惹味。

KiKi擔擔麵($98)

KiKi擔擔麵加入芝麻醬及花椒油，好重麻醬香氣，加埋花椒油微微帶辣，咁就無咁易膩啦～

麻辣肉片紅白麵($98)

麻辣肉片紅白麵參考台式麻辣火鍋，加入鴨血及豆腐及秘製麻辣醬，味道都幾辣吓，麻辣控要試吓佢！

櫻花蝦蟹粉撈腸粉($88)、蒼蠅頭撈腸粉($78)

小食櫻花蝦蟹粉撈腸粉加入大量櫻花蝦，不過蟹粉味就稍為淡咗少少。蒼蠅頭撈腸粉一樣咁惹味！

愛文芒果雪絨椰果白桃烏龍($39)、椰果愛玉冬瓜茶($35)

同樣係香港店限定嘅兩款飲品，愛文芒果雪絨椰果白桃烏龍芒果味道香甜，加入烏龍茶後成件事好清新，椰果愛玉冬瓜茶都唔會過甜。

栗子蒙布朗($38)、伯爵戚風蛋糕配黑糖珍珠($68)

食飯又點可以無甜品，最後食埋呢個栗子蒙布朗同伯爵戚風蛋糕配黑糖珍珠就完美啦！

KiKi麵店  

地址: 中環港景街1號國際金融中心2樓2017號舖

文: Yanica

相、片: Tom Li