芫荽vs榴蓮vs菠蘿包！雞蛋仔藝術節特色口味大哂冷（有片）

可以代表到香港嘅街頭小食當中，點少得雞蛋仔！今年再度舉辦嘅「雞蛋仔藝術節」3月30號開鑼，街市會有多個攤位售賣期間限定嘅特色口味雞蛋仔，好似芫荽、黑毛豬芝士、蘿蔔糕、貓山王榴槤、菠蘿包等等，仲有工作坊等活動等大家一齊參與！

滿屋雞蛋仔　　芫荽雞蛋仔

以粒粒雞蛋仔都有可愛公仔賣相而突圍而出嘅呢間雞蛋仔專門店，今次推出三款活動期間限定口味，最多人有興趣嘅，肯定係呢盒舖滿新鮮芫荽嘅芫荽神（$30）！以為好似平時食麵咁挑走哂就無事？少年你太年輕了，雞蛋仔裡面都有一粒粒芫荽碎㗎！而煎餅亞豬媽（$30）就以韓式煎餅為靈感，微辣惹味。而甜魔們就可以一試以士多啤梨做主題嘅草莓妹妹（$60）。

芫荽神（$30）

（左）煎餅亞豬媽（$30），（右）草莓妹妹（$60）

恆發雞蛋仔　　貓山王榴槤雞蛋仔

作為有餡料雞蛋仔嘅始祖之一，佢地帶嚟六款唔同口味嘅雞蛋仔，重口味人士必試新鮮貓山王榴槤夾心雞蛋仔（$60），離遠已經聞到香味，食落微暖嘅貓山王榴槤肉非常香口！唔鍾意食榴蓮嘅朋友就可以一試黑松露櫻花蝦雞蛋仔（$60），黑松露香味加分，配埋櫻花蝦食落鹹香有致。另外仲有芋泥夾心雞蛋仔、黃金南瓜夾心雞蛋仔、紫薯夾心雞蛋仔，同紅豆泥夾心雞蛋仔（各$30）。

新鮮貓山王榴槤夾心雞蛋仔（$60）

黑松露櫻花蝦雞蛋仔（$60）

甜甜味 x 嘉嘉餅店　　菠蘿包雞蛋仔

兩間餐廳聯手，一間係由前五星級酒店大廚經營嘅小食店，另一間係北角專賣傳統麵包嘅老字號餅店，創作出糅合菠蘿包同雞蛋仔特色嘅小食！將菠蘿包嘅酥皮加到雞蛋仔上面，顏色更深但食落口感亦更酥脆。本土特色口味仲包括雞尾雞蛋仔、椰蓉雞蛋仔同南乳雞蛋仔（各$30）。另外亦有紅莓乾雞蛋仔（$30）同抹茶紅豆芭菲（$60）選擇。

菠蘿包雞蛋仔（$30）

媽咪雞蛋仔　　黑毛豬芝士雞蛋仔

靠唔同創意口味雞蛋仔成功連續三年得到米芝蓮街頭小食推介嘅媽咪雞蛋仔今次一口氣推出三款活動期間限定口味！最特別嘅就要數到香味濃郁嘅西班牙黑毛豬芝士雞蛋仔（$90），鹹香嘅黑毛豬肉配芝士同外脆內軟嘅雞蛋仔，有少少似食緊Tapas咁。另外兩款鹽之花橙香雙層朱古力雞蛋仔（$60）同鳳凰卷雞蛋仔（$30）都相當有驚喜。

西班牙黑毛豬芝士雞蛋仔（$90）

家香　　蘿蔔糕雞蛋仔

而呢間新派廣東菜館就帶嚟三款創意雞蛋仔同兩款飲品，最好玩好食嘅係以蘿蔔糕做主題嘅蘿蔔糕鹹雞蛋仔（$90），真係食到一絲絲蘿蔔同一粒粒臘味，而且可以按自己口味加辣椒醬、XO醬或者甜醬！另外兩款楊枝甘露雞蛋仔（$60）同奶皇醬黃金雞蛋仔（$30）亦甚有港式風味。而兩款飲品分別係熱薑奶茶同熱薑奶茶，前者薑味香濃有暖胃感覺，後者咖啡糖漿香甜唔膩，都值得一試呀。

蘿蔔糕鹹雞蛋仔（$90）

（左）熱薑奶茶（$20），（右）咖啡味凍奶茶（$20）

摩芽雞蛋仔　　星夜雞蛋仔

呢間首創喺雞蛋仔當中加入蜜糖星星嘅雞蛋仔專門店，今次新推出嘅星夜主題特別加入竹炭，令雞蛋仔賣相更特別！而竹炭雞蛋仔可以加入唔同餡料，變成星夜朱古力雞蛋仔（$30）、星夜奶黃雞蛋仔（$30），或者星夜榛子雞蛋仔（$30），粒粒都有多重口感。

星夜奶黃雞蛋仔（$30）

Seasons　　法國Valrhona朱古力雞蛋仔

呢間以四季做主題嘅現代法國餐廳就法式風情融入港式雞蛋仔，推出一甜一鹹兩款「升呢」雞蛋仔。分別係選用法國Valrhona朱古力加上唔同水果嘅法國Valrhona朱古力雞蛋仔五重奏，同加上三文魚同尊貴魚子醬嘅皇室魚子醬伴三文魚香檸忌廉雞蛋仔（各$90）。

法國Valrhona朱古力雞蛋仔五重奏（$90）

皇室魚子醬伴三文魚香檸忌廉雞蛋仔（$90）

茶作　　茶香雞蛋仔配茶味意式雪糕

呢間茶室就將佢地嘅招牌茶味手工意大利雪糕加到雞蛋仔當中，每款雞蛋仔都可以選擇加一至兩球雪糕，分別有鐵觀音、大紅袍，同玫瑰花味（$30/球）選擇。而雞蛋仔亦有三款選擇，分別係濃香鐵觀音雞蛋仔、大紅袍雞蛋仔同玫瑰花茶雞蛋仔（各$30），所以想雞蛋仔同雪糕配返口味得，唔同味道Mix & Match亦得，得咗。

手工意大利雪糕