銅鑼灣已經變成麻辣火鍋嘅重鎮，又有新店登場喇！今次係來自內地嘅重慶劉一手火鍋，喺全球有過千間分店，遍佈東南亞、美加、歐洲、澳洲、中東等地，香港係第988間分店。劉一手於2000年由兩兄妹開設，曾奪得中國火鍋十大著名品牌，今次進駐香港，仲請到蔡瀾親自到訪及題字，好威水。

咁多間火鍋店，究竟劉一手又有咩過人之處？先講湯底，香港店多咗五款獨家款式，包括龍蝦海鮮鍋、椰子滑雞鍋、蕃茄美顏鍋、山珍雜菌鍋同滋補豬骨鍋。龍蝦湯用原隻澳洲龍蝦熬成，味道濃郁杰身，未打邊爐可以先飲一碗先。唔想食太濃，可以揀清甜嘅椰子滑雞。

滋補豬骨鍋、蓄茄美顏鍋 各$84/半鍋、$168/全鍋

龍蝦海鮮鍋 $119/半鍋、$238/全鍋；椰子滑雞鍋 $114/半鍋、$228/全鍋

招牌重慶麻辣當然要試，可揀大中小辣，麻辣膽及原材料都係來自重慶，當地師傅亦有來港監場，保證同當地一樣味。用多款乾濕辣椒炒成，油香十足，先辣後麻，辣勁有層次，最重要係唔會熬出苦味。放入九宮格中，中間最大火可放烚熟需時嘅食物，四邊就可以烚內臟、牛肉等快熟配料。

正宗重慶麻辣鍋 $84/半鍋、$168/九宮格全鍋

配搭麻辣火鍋嘅四寶，係鴨腸、鵝腸、毛肚同黃喉。呢度用嘅全部都係新鮮貨，處理得乾淨，唔會有異味。鵝腸去走肥膏，淥15秒就ok，毛肚夠大塊厚薄適中，淥10秒就得，黃喉都係15秒就食得，三款內臟爽口得來唔韌，同麻辣湯底好夾。

老重慶鮮鵝腸 $138

招牌劉毛肚 $138

爽脆黃喉 $108

其他配料都有接近一百款，另一款特色配料係腸灌豬紅同腸灌蛋，腸衣入面係滑溜嘅豬紅，都幾好食，腸灌蛋就似玉子豆腐，但蛋味更濃亦唔易散。仲有新鮮海鮮、日本和牛及本地手切牛肉等打邊爐必吃配料，可惜丸類唔係手打。

豬腦花 $48、牛肝 $88、腸灌豬紅 $48、腸灌蛋 $38

貴妃蚌 $58/隻、齊天大蟶子 $68/隻；美國雪花肥牛 $198

丸類 $38-$88/8粒

炸重慶酥肉 $58

醬料枱都跟足重慶店，16款醬汁包括自家製麻油，仲有少見嘅老干媽醬、紅油腐乳等，店方都有幾款推介食法，可以DIY自己口味嘅油碟。

巨峰提子、青檸、椰汁、菠蘿沙冰 $38

餐廳佔地兩層，裝修好似重慶老房子，設計古色古香，不過大枱唔算多。當日採訪未到7點已經好多人幫襯，想食記得預先網上book定位呀。

重慶劉一手火鍋

地址：銅鑼灣渣甸街66號Aura on Pennington地下及1樓

文、相、片：Perrins