香港舊式茶樓，特別係仲有得推車仔，吸印仔嘅茶樓就愈嚟愈少，不過荃灣最近有間新開嘅茶樓，居然保留返推車仔叫賣點心嘅特色，仲有多款好少見到嘅懷舊菜式添，啲回憶即刻返晒嚟！望一望個名，蓮香棧？咁熟嘅？原來係中環120幾年歷史老店，蓮香樓嘅姊妹店呀。

荃灣店嘅裝修同風格，都盡量以懷舊為主，保留用吊扇，門口有糕餅店。入到去坐低，伙計除咗問你要咩茶，仲會問你要茶壺定茶盅，之後就拎住個金色大水煲去沖茶。依家真係好少見到茶盅呢樣嘢喇！負責人表示，茶盅係方便啲一個人去飲茶嘅茶客，而且用茶盅唔會好似茶壺咁浸住啲茶葉咁耐，令到茶葉變味。

不過，講到茶樓最大嘅傳統特色，當然就係推車仔啦。姐姐推住架點心車仔，邊推邊叫「馬拉糕、千層糕」…聽到啱食嘅就走埋去，仲可以打開蓋望下啲點心，揀啱邊籠就拎邊籠，再畀張卡仔姐姐吸印。嗚，畫得點心紙多，好耐冇試過吸印仔喇，好有親切感呀！

成個氣氛都咁懷舊，嘢食當然就更加啦。

點心款式都相當懷舊，古法馬拉糕梗係唔少得啦，啱啱出爐，熱辣辣仲出緊煙嘅，食落有蛋香味，口感鬆軟。

講抵食嘅就係百花釀魚肚，真材實料，件魚肚好大份下，仲好爽口，面頭嘅蝦膠亦彈牙。

至於鮮蝦銀針粉就係呢間新店獨有嘅，本店同另一間姊妹店都冇嘅，不過味道就略嫌偏淡咗少少。

 豬潤燒賣

除咗點心，仲有啲可以單點嘅懷舊菜式，都係得呢間舖先有咋。

先介紹呢道金錢雞，年輕一代嘅朋友可能未必聽過（同金錢肚係冇關係嘅）。金錢雞喺舊陣時嚟講，係一道下欄嘅燒味，一嚿有三層嘅，最底層係成大嚿肥豬肉（正確嚟講係肥膏），上面再疊有叉燒同雞肝，製作上都花功夫㗎。三樣嘢嘅texture都好唔同，所以一啖食落去個口感好豐富，軟腍得嚟又有啲黏身，油脂香但食晒一件都幾膩下……

雙冬炒鴿甫同骨髓三鮮，又係啲超懷舊嘅菜式。雙冬係指冬菇同冬筍，連埋乳鴿肉一齊炒。而三鮮就係魷魚、鮮蝦同斑片，一條條白色又長又軟滑嘅就係牛骨髓。

至於中環老店一直都有傳話因為嗰區要清拆重建而會受到影響，開飯仔都問過負責人，不過佢哋就話一切都仲係商議中，暫時都未有結論，惟一肯定嘅就係佢哋個租約去到2019年年中就會到期。嗯，都係嗰句，珍惜眼前「舖」呀。

蓮香棧
地址：荃灣蕙荃路22-66號綠楊坊L1樓P9-9A號舖

文、相：Kar