呢間由時裝品牌JOURNAL STANDARD開設，主打班戟及漢堡嘅日本過江龍，繼九龍塘分店後而家正式登陸埋尖沙咀～尖沙咀店裝修簡單舒服，以黑白灰為主調，有些許日系型格感。而今次新店仲帶咗九款獨家限定菜式畀大家，款款都有啲驚喜喎。
尖沙咀店獨家菜式：
班尼迪蛋梳乎厘班戟($129)
平時食egg benedict都會配英式鬆餅，而呢度就以呢兩年最hit嘅空氣感梳乎厘班戟做底，班戟均採用日本國產的雞蛋及麵粉製作而成，帶有濃濃牛油香，質感鬆軟細密。配上鹹香嘅煙三文魚及煙肉，再加上流心水煮蛋同火箭菜，鍾意鹹甜配搭嘅朋友就啱啦。
蕃茄全蟹意粉 ($178)
淨係賣相已經夠吸睛啦！放入原隻水蟹，水蟹都幾大隻，而且特意選用較幼細意粉，吸收晒鮮甜嘅蟹味及微酸嘅蕃茄味，食多多都無問題啊。
J.S.迷你漢堡塔($148)
呢個burger塔一樣啱晒打卡！以三個迷你漢堡重疊而成，包括吉列牛肉漢堡漢堡、魚柳漢堡及雞肉漢堡，一次過可以食晒三個味道，無論係獨食定share都咁合適。
龍蝦牛油果多士($158)
今次新店限定包括兩款龍蝦菜式，包括龍蝦牛油果多士，香軟嘅牛油果配上彈牙龍蝦，味道同口感都好rich。
龍蝦沙律($158)
而龍蝦沙律以啖啖肉嘅美國緬因州龍蝦拆肉製作，配埋新鮮沙律菜、牛油果、車厘茄、粟米及雞蛋等，加埋鹹鮮嘅三文魚籽，健康又好味～仲可以自選明太子醬或胡麻醬添！
為咗令素食人士都享受到餐廳招牌漢堡，店内特別提供用Impossible™素肉製成嘅漢堡，另外所有漢堡都有得Takeaway添～
而呢個新出嘅紅莓醬開心果班戟除咗有滿滿開心果醬外，上層仲有棉花糖，淋上紅莓醬後就會唔見，好玩又好食啊！
地址: 尖沙咀廣東道3-27號海港城港威商場2樓2608-2609號舖
文: Yanica
相、片: Tom Li