金黃酥脆有蛋香嘅蛋卷係咪你嘅Favorite？香港蛋卷關注組集合咗唔少愛食蛋卷嘅網友，互相交流唔同蛋卷嘅特色，或者傾下點食最滋味等等。開飯仔就整理咗以下最多網友推介嘅品牌。
牛油味最香 德成號
北角馳名蛋卷店，有原味家鄉雞蛋卷、鮮牛油同鮮椰汁味，分別嘅蛋香、牛油香同椰汁香都夠突出。大部分都會推介試鮮牛油味，蛋香加上牛油香加倍誘人。味道唔會過甜，三款口感亦夠鬆化！留意返數量有限，建議朝早9點去到排隊，9:30就會有員工截龍。每人只限買四細罐，而一大罐計兩細罐。
售賣點：德成號北角門市
口感無得輸 龍記
100%香港製造嘅蛋卷品牌，蛋卷呈蜂巢狀，比較厚身而且咬落更有層次更鬆脆！有原味同咖啡味兩款，咖啡味真係好有咖啡香，不過亦有網友指有少少燶味。 原味有蛋香而且甜度適中。包裝有齊膠紙封條、泡泡紙同牛油紙，大部分蛋卷都Keep到完整唔會碎，值得加分。
售賣點：屯門龍記軒門市或週末市集（可留意品牌Facebook）
圖: (右)Ritakitty
更多【開飯專題】： |
健康無添加 尊
同樣100%香港製造，更標榜係無添加嘅蛋卷。原來因為創辦人對添加劑敏感，所以就想做一款畀大家食得健康嘅蛋卷。蛋卷口感幾脆，雖然有網民指唔夠鬆化，不過睇返佢哋無用起酥油，所以偏實啲都可以理解。而且有牛油、金莎(鹹蛋)、榴槤、抹茶，甚至中國芝士(腐乳)口味！
售賣點：大生生活超市、金田井駄菓子屋
老字號新包裝 回味
傳承舊品牌添寶嘅配方，採用新西蘭牛油、每日農場直送鮮雞蛋，以人手工藝製造嘅蜂巢蛋卷。最多人推介紅色罐嘅特濃雞蛋卷，有蛋香而且好鬆脆！白罐嘅特級牛油雞蛋卷都有牛油香，略嫌綠色罐香濃椰汁雞蛋卷嘅椰汁香比較淡。
售賣點：菁雲、SOGO、一田、city'super、誠品書店、千色、HKTVmall等
圖: 品牌Facebook
Bouns！澳門最香餅家
嗱呢間1958年開設嘅老字號位於澳門，但勝在可以喺網店訂購然後速遞到港。佢哋嘅長蛋卷口感偏厚實，帶少少豬油香而且唔會太甜，反而係有少少鹹味。不過其實餅店最馳名最多人買嘅係粒粒杏仁餅，裡面有粒粒杏仁碎，杏仁香氣濃郁，最重要嘅係夠鬆化唔會硬到咬唔開！
網店：https://chuiheong.com/storefront
圖:品牌網店
文: Cathy.H
相: Tom Li