又到蟹迷最期待嘅大閘蟹季節喇！今次會一次過介紹晒大閘蟹宴同特色大閘蟹主題下午茶畀大家，部分仲有優惠𠻹～
六両大閘蟹套餐 个園竹語 
六両大閘蟹套餐一共有8道菜，糅合淮揚同滬菜嘅特色，呈現多道鮮味濃郁嘅蟹饌；餐廳嚴選六両江蘇大閘蟹公蟹，更設貼心「拆蟹」服務，食客可以輕鬆享受蟹肉嘅鮮甜滋味。套餐包括鮮拆蟹粉燴魚翅，精選當季嘅母膏蟹，每日由專人鮮拆蟹黃同蟹肉，再加入以老雞燉製長達6小時嘅清雞湯慢慢煨製魚翅，將蟹粉嘅鮮甜同魚翅嘅滑嫩結合得天衣無縫。經典點心蟹粉小籠包嘅內餡，以足料豬肉加入新鮮手拆蟹粉，膏香味濃，蟹粉鮮甜。
價錢: 每位$588，兩位起，限量供應，建議提早預訂。
金秋時令大閘蟹盛宴 明閣
呢間酒店嘅中菜廳，各分店推出唔同嘅大閘蟹套餐，旺角店會推出「秋令 ⋅ 鮮旨蟹饌」時令套餐，結合燕窩、遼參等高級食材，炮製多款精緻蟹饌。包括黑醋珍珠蟹粉蟹肉燕窩羹、蟹粉脆皮遼參同清蒸大閘蟹等。而灣仔店就推出「秋韻 ⋅ 蟹皇盛饗」時令套餐，結合鷓鴣、龍蝦同和牛面頰等海陸空食材製成，包括花旗參石斛燉鷓鴣、芙蓉蟹粉波士頓龍蝦、砵酒燴和牛面頰同花膠蟹粉一口鮑魚脆米飯，啱晒帶屋企人嚟食！
秋令 ⋅ 鮮旨蟹饌: 9月23日至11月30日限定供應，每位$1,288元。
秋韻 ⋅ 蟹皇盛饗: 10月8日至11月30日限定供應，每位$1,388元。
時令大閘蟹饗宴 國金軒
米芝蓮推薦食府特別呈獻以江蘇大閘蟹入饌嘅八道蟹饌盛宴，行政總廚鄧浩宏師傅以傳統粵菜嘅精湛工藝，創新打造每一道蟹宴菜式。最不容錯過嘅係鮮紫蘇蒸大閘蟹，每隻足足六両重，蟹肉鮮嫩，蟹膏濃稠，配以紫蘇蒸製，令蟹香更加鮮明。蟹粉芙蓉鍋巴老虎蝦同樣令人驚艷，彈牙嘅老虎蝦搭配酥脆金黃嘅鍋巴，再覆蓋鮮甜蟹粉，完美展現出豐富嘅層次口感。另有蟹粉冬絲豆腦素翅羹、灌湯蟹粉小籠包同薑茶金薯湯丸等，豐富又不失經典滋味。
供應時間: 10月7日至11月30日期間供應，每位$888（兩位起）
「秋日蟹逅」下午茶 CRUISE
呢間空中餐廳及酒吧隆重推出「秋日蟹逅」下午茶，一邊欣賞維港壯麗景色，一邊細味精緻嘅大閘蟹主題下午茶。鹹點方面包括鎮江薑醋蒸大閘蟹、蟹粉小籠包、蟹粉魚子醬椰青汁燉蛋白、蟹粉蝦仁配脆米餅同蟹粉瑤柱蛋麵，帶嚟豐富嘅蟹鮮滋味。甜點方面有螃蟹造型朱古力、蜂蜜薑汁撞奶、栗子銅鑼燒、柑橘朱古力千層酥同檸檬罌粟籽鬆餅，每一款都好細緻，超值又IG-able～仲有無限供應即叫即製嘅雞蛋仔、限定雪糕同各款配料，包你一定鍾意！
供應時間: 2024年9月21日至11月30日，星期六日及公眾假期期間下午3時至5時，每位$480起（兩位起，需全桌客人享用）
食神瀑布陽澄湖蟹黃撈套餐 等等HEA 
九龍城文青台灣菜館，每逢大閘蟹季都會推出唔同嘅大閘蟹套餐或放題～今年呢個食神瀑布陽澄湖蟹黃撈套餐就幾抵食，可以食到瀑布蟹黃撈麵/飯、蟹黃鹽酥雞、蟹粉小籠包、蟹粉時菜以及包一杯飲品，全部都勁足料，特別係蟹黃撈麵每一啖都係滿滿蟹皇味。最正係可以叫一人份，就算自己去食都冇問題！
大閘蟹放題·串燒廚師發辦 匠森串燒
港式串燒專門店，蟹季同樣供應季節限定90分鐘「大閘蟹放題·海鮮&串燒&燒肉廚師發辦」～放題仲可以食3-4両重嘅大閘蟹、無限量嘅磯燒海鮮、港式串燒同燒肉。熱葷有鮮味滿滿嘅蟹黃飯同花甲粉，亦可以任飲薑茶、特飲同汽水，啱晒鍾意海鮮嘅大胃王呀。
餐飲券：[成人] 季節限定90分鐘 大閘蟹放題·串燒廚師發辦 (1位用, 2位起)（9折）
文：Yanica
編：Cathy
