又到咗食大閘蟹嘅季節喇，灣仔有間食蟹嘅專門店，首次引入咗北海道石狩川嘅野生大閘蟹，第一日開賣，一個下晝已經賣晒500隻喇！不過，這些機會仲有可能屬於你哋嘅……嚟緊仲會陸續抵港嘅。

介紹下呢種北海道石狩川野生大閘蟹先，一年兩季當造，分別係4、5月，同9月尾到11月頭，即係而家。同其他大閘蟹相比，野生大閘蟹個肚有坑紋，顏色灰白啲。

蟹膏都幾多呀，鮮橙色幾creamy，都幾甜，如果細蟹嘅話，分分鐘啲膏仲多過啲肉呀。堂食嘅話，跟餐加錢（$350，6兩）就有得食，師傅會用木箱原隻蒸熟。

懶豬唔想自己拆嘅話，可以請師傅幫手呀，拆完之後砌到靚一靚，還原返晒落個蟹殼度，一匙一匙咁嗶嚟食，正。

想再開心啲，就可以叫黑魚子海膽大閘蟹，同樣都係拆晒肉，肉同膏撈埋一齊，on top再加一層黑魚子同北海道利尻海膽，一啖食到三種口感，更見鮮甜！

除咗堂食，外賣都得，早啲預訂就得。外賣盒會送埋蟹醋同紫蘇葉呀。最平160蚊4兩就有交易，大隻啲去到11、12兩嘅就500零蚊隻。

餐廳提供

有晒健康證明㗎可以放心，大閘蟹迷出動喇！BTW，唔好話開飯仔唔提你，佢哋大約每星期返貨兩次，想食要早啲預訂呀，嚟緊最快就應該係今個星期五晚有得食喇。

蟹膳
地址：灣仔譚臣道3號地下

文、相：Kar