嚟緊睇怕都係紫薯嘅世界！出晒名多嘢食嘅葵涌廣場入面，有幾間小食店都有紫薯食！有紫薯撻有紫薯窩夫又有紫薯沙冰，自問係紫薯粉嘅你哋，行一轉應該有唔少收穫！不過，有冇咁多quota先？

紫薯芝士撻 Little Jobs

呢間本身係飲品店嚟嘅，最近賣埋芝士撻，原味、紫薯、抹茶同咖啡4款味，即叫即叮，只要你部相機唔係食得太慢，到你食嗰陣可以感受到微溫。雖然賣相唔算話好靚，但食落啖啖紫薯蓉，都幾香濃，而撻皮係酥皮嚟，外酥內軟，細食少少嘅食完一個都飽咗。

紫薯度：****
價錢：$22

紫薯窩夫 Waffle Corner



紫薯粉見到呢度嘅紫薯窩夫都幾難忍口唔試返個，成份都係紫色嘅！紫色嘅雪糕，紫色嘅cream，叉開件窩夫都係紫色嘅！逐樣講下，窩夫中間都係紫薯夾心嚟嘅，令到成嚿原本冇乜味嘅窩夫即刻香咗，不過記住要窩夫連埋紫薯cream一齊食，咁先至係真正嘅享受，因為最重紫薯味就係啲cream。至於雪糕呢，就其實係香芋味嚟嘅，唔會話太甜，同紫薯都幾夾。呀，留意返，呢個配搭唔係官配嚟，自己揀嘅。

紫薯度：****
價錢：$32 （窩夫$28，紫薯夾心加$4）

紫薯西多士   魷味



又係邪惡嘢。西多士！即叫即整，要畀少少耐性等下呀。一份6件，熱辣辣炸出嚟再淋成層煉奶喺面，的確係幾吸引。不過，不過當你一翻開件西多，就可能會有啲失望喇。中間嘅紫薯醬都幾少下……所以食落都唔會太重紫薯味。

紫薯度：**
價錢：$16

紫薯牛奶沙冰  Mini Jobs



葵廣唔止有紫薯食，仲有紫薯飲。呢間舖主要賣嘢飲嘅，連韓國早排出嗰隻些牙杯（即係兩格杯）都有得賣，而今次就主要同大家講下佢嘅特飲：紫薯牛奶沙冰！隻色就好粉紫好靚嘞，飲落呢，超足料！紫薯味好濃，好似堅係食緊成嚿紫薯咁，仲有啲紫薯粒粒添！認真，一個人飲晒一杯都幾飽。但係呢，用支幼得嚟仲要打咗個圈嘅飲管嚟飲，係有少少辛苦，要畀啲力先吸到沙冰上嚟。

紫薯度：*****
價錢：$28

紫薯糯米糍  長洲地道糯米糍



葵廣最底嗰層，有檔有好多款糯米糍賣嘅，抹茶呀芒果呀之類，梗係唔少得紫薯。買咗粒嚟試下。個size正正常常啦，攞上手幾軟熟，咬落都夠煙韌，但係層皮厚粉咗少少囉。紫薯餡都多嘅，但味唔濃，老老實實，$12蚊粒唔算平呀。

紫薯度：**
價錢：$12

紫薯牛角包   Happy Toast



嚟葵廣食包？呃，但係如果我話你聽係紫薯牛角包會唔會又唔同講法？呢度有好多款牛角包，其中一款係紫薯牛，即係忌廉紫薯餡。影相係幾靚嘅，開口嘅牛角包中間夾滿晒紫薯蓉，但食落嘅味就唔算話好濃喇。

紫薯度：***
價錢：$28

紫薯流心撻  Pie & tart



講咗啲咁heavy嘅，介紹返個流流地嘅，我指流心個流。呢個紫薯流心撻唔係新出嘅，但見到Pie & Tart有得坐低堂食真係第一間，呢個紫薯流心撻坐低食會比較方便。成個撻面都係深紫色嘅紫薯粉，一嗶落去就即係流晒漿，淺紫色嘅，暖暖地，紫薯味都重嘅，但略嫌甜咗少少啦。

紫薯度：***
價錢：$12

文、相、片：Kar



葵廣仲有乜好食：
葵涌廣場飲飲食食（二）2樓新開飲品店 文青系健康派果汁大放送（有片）
葵涌廣場飲飲食食（一）2樓新開小食店 撈雞烤菇芋圓好吸引（有片）
平民美食集中地 葵涌廣場逐層掃


 

隨時接收最新資訊
讚好OpenRice專頁！