P助與粉紅兔兔嘅粉絲，每次想見佢哋都要飛轉台灣或者日本，難得今次佢哋終於喺香港開pop up café呀，係要去朝聖一次嘅，應該。即刻睇下有啲咩食先！

最開心嗰款應該係all day breakfast，有蛋有蕃茄有三文治有bacon又有茄汁豆，好豐富，粉紅兔兔仲變身做咗薯蓉。

而最萌嘅就應該係奄列吉列豬扒咖哩飯同明太子蛋包飯喇，大大個粉紅兔兔頭像，得意到咁，嗶第一啖嚟食都要掙扎一陣。前者嘅咖哩幾香，但後者嘅明太子醬略嫌淡咗少少，包住啲飯嘅蛋亦薄咗啲啲。

另外仲有特色牛肉丼同海鮮意粉，P助悄悄地同隻鵪鶉蛋合咗體，細細粒，so cute！

芝士青口同餃子雞翼用嘅托盤，都係粉紅兔兔頭嚟呀！好靚，如果食完可以拎走個盤走好喇嗚！

飲品方面，有雪糕特飲同green tea latte、cappuccino等，P助再次化身成細細粒嘅綿花糖，點忍心一啖食咗佢？

成間餐廳由天花板到牆到枱到櫈都係P助與粉紅兔兔嘅裝飾，仲周圍都有cushion，完全被粉紅兔兔包圍嘅感覺好治癒。Café同時有精品限量發售，好似糖呀figure呀file呀之類，粉絲要帶定多啲錢喇。

如果你同P助與粉紅兔兔有緣嘅話，仲有機會同佢哋見面、握手、抱抱同影相添呀！Mark低喇，11月11、12號佢哋會不定時出現㗎！

YATA Kanahei’s small animals café by IZUMI CURRY
地址︰一田超市（觀塘） apm LG
開業日期：11月8日，10:30am
P助與粉紅兔兔出巡時間：11月11及12日，11:00 am - 07:00pm期間

文、相：Kar