Chef Le Mon謝霆鋒又有新搞作喇！由今日開始，去麥當勞就可以食到霆鋒嘅大作，鋒味漢堡！整餐整全套，佢仲創作埋全新口味嘅shake shake 薯條粉、麥旋風同特飲添呀！
鋒味系列會分兩個階段推出，今日就食到嘅包括有安格斯肉醬煎蛋包、港式燒味風味shake shake薯條、橙汁雜飲同鋒味曲奇奶茶麥旋風。
霆鋒話呢啲ideas都係嚟自佢最熟悉嘅香港味道同家常菜，例如佢以前成日喺片場食飯盒，就會食到魚香茄子飯呀、肉醬煎蛋飯呀咁，於是就將肉醬煎蛋飯變咗做肉醬煎蛋包。啲肉醬混入多種香料，塊安格斯牛肉都好厚身下，再加埋煎蛋、白芝士、羅馬生菜等，幾juicy。
而第二階段就會喺11月20號開始推出，到時就可以食到埋另外幾款新品：洋蔥吉列豬扒飽、避風塘炒蟹味調味粉同鋒味菠蘿冰。霆鋒話以前冇試過喺M記可以食到原塊咁大塊嘅吉列豬扒㗎，而且啲洋蔥仲要有兩種口感，有啲洋蔥呢就炸過嘅，有啲呢就係香炒，加埋半溶芝士、酸甜沙律醬，呢個靈感來源嚟自茶記洋蔥豬扒飯嘅新包都幾有驚喜。
文、相：Kar
片：Tom Li