10月頭咁多紅日，最啱約friend搞飯聚，一於去食酒店buffet啦，呢排各間酒店都陸續換上秋季新自助餐主題！有乜新酒店buffet主題好食？有啲主打海鮮，有啲主打手工菜，仲有啲同大品牌搞聯乘添！睇下呢6間酒店自助餐推介先！
任食生蠔和牛大阪燒 The Place
除咗繼續有港人必食嘅海鮮冷盤、即開生蠔、火灸壽司，餐廳亦供應近期好hit嘅關西芝士大阪燒、即炒鐵板和牛粒、大蝦天婦羅、北海道十勝黑豚肉泡菜芝士焗龍蝦、韓式炸雞、人蔘雞湯、韓式香烤牛肋骨等日韓美食。
甜品仲吸引，有煙煙韌韌嘅日式蕨餅、北海道綠茶芝士蛋糕、柚子蜂蜜蛋糕、半熟芝士撻、紫薯撻等！當中最特別，就係呢個「禪」味噌焦糖朱古力蛋糕，「禪」味甚濃。
「日韓秋祭」主題自助餐
供應日期：2017年10月1日至11月30日
供應時間：6:30pm-9:45pm
價錢：（星期日至四及公眾假期）成人$608/位、小童及長者$428/位；（星期五、六及公眾假期前夕）成人$648/位、小童及長者$468/位
舊香港漁港風味 都會自助餐廳
以漁港風味作為自助餐主題，海鮮絕對唔少得，配埋好有鑊氣嘅港式煮法，鮮味盡現。菜式有：火焰龍躉球、避風塘炒蟹、辣酒煮翡翠螺、黃金蝦等，仲有常見嘅燒味、滷水、即煮生滾粥、即製煎釀三寶等港式食物。
另有凍海鮮如紐西蘭生蠔、小龍蝦、大蝦、藍青口、鱈場蟹腳等，至於甜品就有Mövenpick雪糕、朱古力噴泉、即製雲呢拿蛋白凍梳乎厘等等。
「細味漁港海鮮風情」自助晚餐
供應日期：即日起至2017年11月30日
供應時間：6pm-9:30pm
價錢：（星期一至四）成人$498/位、小童$368/位；（星期五至日、公眾假期前夕及公眾假期）成人$548/位、小童$408/位
韓國海膽原板上 灣景廳
聽到有原板海膽，係咪已經流晒口水呢？凡惠顧「和牛‧海膽」自助晚餐，每位客人就可以品嚐到一板橙黃又亮澤嘅韓國海膽，口感鮮味又creamy！此外，仲有即燒扒原隻扇貝配海膽牛油汁、炸海膽脆奶、香煎和牛薄切配紅酒醋豉油汁、和牛生薑燒飯卷等限定美食！至於冰鎮海鮮如蟹腳、翡翠螺、新西蘭青口、麵包蟹、三文魚、八爪魚、吞拿魚、北海道帶子、甜蝦等亦會輪流供應。
每晚會有8款甜品供應，當中有MÕVENPICK雪糕、法式泡芙、芒果千層酥、木糠布甸蛋糕、牛油麵包布甸、香橙酒焦糖燉蛋等等。
「和牛．海膽」自助晚餐
供應日期：即日起至2017年10月31日
供應時間：6:30pm-9:30pm
價錢：（星期一至四）成人$478/位、長者$438/位、小童$348/位；（星期五至日、公眾假期及其前夕）成人$518/位、長者$458/位、小童$378/位
「蠔」食扇貝 城景閣
生蠔友一定鍾意，因為除咗有美國、紐西蘭即開生蠔，仲有10幾款生蠔菜式，如酥炸日本生蠔、珍珠蠔野菌迷你芝士撻、煙燻生蠔伴龍蝦沙律、大葉廣島蠔天婦羅、鮮珍珠蠔周打湯、砵酒金蠔花膠炆雞球等等，齋聽都令人興奮！甜品有Movenpick雪糕、蝴蝶豌豆花蜜糖伴蛋白球、洛神花檸檬蛋白批、榴槤糯米糍及芒果糯米糍等。
三式串燒生蠔喺餐廳內嘅開放式廚房即場燒製，款式包括薄牛肉生蠔卷、煙肉蒜仔生蠔串及薄牛肉芝士蛋生蠔串。而四色焗生蠔係以韓國生蠔炮製出4款不同口味嘅焗蠔，有煙肉芝士洋蔥焗生蠔、莧菜芝士焗生蠔、蒜茸焗生蠔及秘製蛋黃醬芝士焗生蠔。
每位客人免費獲贈野菌蟹籽醬燒蘇格蘭珍寶扇貝一隻，將炒好嘅野菌、藍青口放入貝殼中，再將煎香嘅扇貝肉連同蟹籽醬放入貝殼中並焗至金黃色，鮮味十足。仲有任飲果汁、啤酒、紅白酒添！
「蠔饌‧海鮮自助晚餐 - 珍寶扇貝篇」
供應日期：2017年10月1-31日
供應時間：6:30pm-9:30pm
價錢：（星期一至四）成人$498/位、長者$438/位、小童$338/位；（星期五至日及公眾假期）成人$528/位、長者$468/位、小童$368/位
大笪地X可口可樂 中西∙環
港島太平洋酒店與可口可樂搞crossover，重現香港大笪地嘅特體回憶！餐廳炮製避風塘炒龍蝦鉗、蟹肉鵝肝焗響螺、紫蘇辣椒膏炒花甲、花雕京蔥爆蝦球、旭日黃金蝦等港式經典。大廚亦以「當年今日」主題創作幾款新甜品，有益力多戚風蛋糕、麥芽糖燉蛋、楊枝甘露等。亦有當然少不了龍鬚糖、砵仔糕、麥芽糖餅等懷舊小食。冰鎮海鮮有包括波士頓龍蝦、鱈場蟹腳、青口、刺身等，甜品亦有彩虹噴泉、Movenpick雪糕等。
除此之外，餐廳仲會擺放可口可樂經典珍藏、海報，仲有可樂主題嘅小道具畀食客們影相添！
歡「樂」大笪地自助晚餐
供應日期：2017年10月1日至11月30日
供應時間：6:15pm-9:30pm
價錢：（星期日至四）成人$388/位、65歲或以上長者$268/位、3-11歲小童$268/位；（星期五、六及公眾假期）成人$428/位、65歲或以上長者$308/位、3-11歲小童$308/位
萬聖節嘩鬼美食 8度餐廳
10月除咗有國慶、中秋節、重陽節，仲有萬聖節！餐廳正舉行「環球海鮮」主題，嚟緊10月中會升級成萬聖節嘩鬼主題，大廚將美食換成驚嚇造型，有蟲蟲茄蓉肉醬意大利粉、香辣肉眼球、鬼怪士多啤梨芝士慕絲、眼珠洛神花啫喱、萬聖節嘩鬼曲奇及朱古力慕絲墳墓等。
另有法國及美國生蠔、蟹腳、刺身等冰凍海鮮、波士頓龍蝦伊麵、即製川辣鮮蜆煲、蒜蓉粉絲蒸皇帝蟹腳、泰式咖哩大頭蝦、桂花片皮鴨、芒果拿破崙、日式紫薯慕斯蛋糕、Häagen-Dazs雪糕等。
「萬聖狂歡」自助晚餐
供應日期：2017年10月13-31日
供應時間：6pm-9:30pm
價錢：（星期一至四）成人$458/位、長者$408/位、小童$328/位；（星期五至日、公眾假期及前夕）成人$498/位、長者$438/位、小童$358/位
注：以上價錢均只需加一
文：Joyce
