快餐店嘅豬柳蛋漢堡就食得多，咁配港式小食雞蛋仔又點睇？上水呢間街坊小食店不時推出創意口味，最近就有豬柳蛋雞蛋仔。食埋招牌手撕雞、腸粉或者煎餅更滿足。
 

特色口味雞蛋仔

豬柳蛋雞蛋仔（$23）

潮食係附近唔少學生同街坊嘅醫肚之選，貪佢地出品大份抵食又不時有驚喜，例如最近新出嘅豬柳蛋雞蛋仔，開飯仔就真係第一次聽到呢個搭配喇。倒入原味蛋漿後加入漢堡扒粒、雞蛋同少少椒鹽黎調味，之後再放入芝士片，等熱力令芝士半融就食得。
 

外表睇落無乜特別，但咬落味道的確幾似快餐店嘅豬柳蛋漢堡！只係麵包改做外脆內軟嘅雞蛋仔，所以係雞蛋仔嘅口感加豬柳蛋漢堡嘅味道，係幾有新鮮感嘅。
 

蘋果肉桂雞蛋仔（$20）

另一個令人諗起快餐店食品嘅就係蘋果肉桂雞蛋仔，整嘅方式亦非同一般。先倒蛋漿但唔合埋蓋，咁雞蛋仔就唔會漲起，之後再加入肉桂蘋果粒，稍微加熱就食得。
 

粒粒蘋果粒加埋肉桂香，是咪諗起快餐店嘅蘋果批呢？雞蛋仔無批皮嘅脆口，但多左一份淡淡嘅蛋香同鬆軟嘅口感，甜度適中。而且小食店選料亦相當認真：新鮮雞蛋、日本麵粉同澳洲牛油。加上即叫即整熱辣辣脆卜卜，所以記得趁熱食，唔係雞蛋仔變腍口感就失色啦。
 

飽肚小食之選

手撕雞煎餅（$25）

煎餅亦係即叫即煎，會加雞蛋同芝麻增加風味，之後加入醬汁、菜絲同配料。開飯仔就揀左呢度嘅招牌手撕雞，最後會加埋薄脆。大大份又夠足料。
 

最值得一讚嘅係手撕雞肉幾滑，鹹香惹味得嚟又係啖啖肉。而扣分位就係煎餅皮厚左少少，薄返啲就更好喇。
 

蔥花蝦米腸粉（$25）

估唔到呢度連石磨腸粉都有，用近年多左餐廳選用嘅櫃桶式，好處係好快就蒸好，睇落皺哂皮咁，但口感都Keep到幾滑。
 

食落略嫌唔夠米香，不過加配料同醬汁撈埋一齊食就絕對夠味。特別係麻醬非常香口，配爽滑腸粉真係無得輸。

舗仔唔大而且小食都係即叫即整，價錢睇落唔算平但足料大份，而且學生仲有優惠！所以每逢Lunch Time同放學時間就特別多學生嚟食野，唔想等耐啲嘅話就建議避開呢兩個時段啦。

潮食
上水智昌路8號順欣花園地下3D號舖

文、相、片：Cathy