「再見喇下次見啦 有下次嘅話」，過完年又係轉工嘅高峰期，正所謂好嚟好去，雖然未必再有下次見，但Last Day點都要派散水餅畀同事嘅，不過揀散水餅都係一種學問，最好就係靚靚仔仔睇落得體（但心諗又唔好太貴）！今次精選咗10間賣唔同種類，但都好適合做散水餅嘅店舖畀大家，由甜品類到茶包同燉湯都有，有誠意又有新意，唔使煩喇～～
無添加戚風蛋糕 老陳餅店
位於元朗主打戚風蛋糕嘅小店，睇外表只係一嚿普通海綿蛋糕，無任何配料同裝飾，但唔少人食過都返唔到轉頭。雖然材料簡單，但製作過程一絲不苟，用料都非常講究，所以戚風蛋糕鬆軟、濕潤有蛋香，口味包括香蕉、芝麻、抹茶、朱古力同伯爵茶，特別推介伯爵茶，茶味香濃又唔太甜。重有得獨立包裝，派畀同事一人一件就最方便。
圖: 超鬆軟卷蛋 Happy Roller
一間老字號餅店開設嘅副線品牌，主打多口味卷蛋，選用頂級材料，採用零卡稀少糖及少油少糖配方製作，食都食得放心啲～蛋糕鬆軟濕潤，奶油香而不膩，口味多元化，如丸久小山園抹茶、鐵觀音麻糬生乳卷蛋同埋竹炭Oreo麻糬都好受歡迎。
圖: Mirurinw
散水撻 蛋撻王
講到最代表性嘅港式食物，其中一樣一定係蛋撻～呢間蛋撻店推出散水撻，包括任選撻類產品12件、散水撻紙袋1個、紙盒1個同紙托15個，上面寫滿散水搞笑字句，可揀酥皮或牛油皮蛋撻、葡撻、牛乳撻、芝士撻、雞批、椰撻同榴槤蛋撻，好多元化。想平平地但又有好似有啲特色咁嘅話，都幾啱。
圖: 餐廳官方網站
真材真料芋頭酥 大頭芋烘焙
去台灣必買嘅芋頭酥原來香港都有得食，買嚟做散水餅仲好有新鮮感！芋頭酥酥皮薄而輕巧，芋頭餡料係百份百芋頭肉，無添加任何麵粉，甜度適中，帶濃郁芋頭香。除此之外更有芋頭鹹蛋黃酥同芋泥蛋糕等。
圖: bellywongs
幽默搞笑字句 華爾登麵包餅店
超人氣散水餅店，想訂真係要早啲呀！主打散水曲奇，有卡通、心型同雲型等，最正係文字夠晒搞鬼又貼地，好似有「走先啦」、「江湖再見」同「我唔撈啦」等，同事收到一定記得你。
圖: leewengii
人氣法式甜品 Lovever Patisserie
公司多女同事嘅，送呢間法式甜品就最啱，主打法國宮廷經典點心達克瓦茲，有啲似三文治咁由兩塊酥脆嘅餅皮夾住餡料。招牌包括瑪黑藍伯爵、抹茶麻糬、伯爵茶同芝麻麻糬等～
圖: hk.good.food
多口味貝果 日月之幸
唔送糕餅，送近年人氣食品之一嘅bagel一樣得。本店貝果網店，質地屬煙韌鬆軟型，堅持選用日本麵粉，重點係減甜、少油同少糖，口味超多款，每個星期都唔同，如紫薯肉鬆、檸蜜雪山、可可雪山、香草蒜蓉同伯爵茶紅藍莓奶酪等都好有特色。
圖: 餐廳官方網站
脆皮麻糬泡芙專門店 治癒菓子
想支持下小店嘅，有呢間由90後前空姐開設嘅泡芙專門店。主打脆皮泡芙，內餡仲有麻糬添㗎，泡芙全部都選用日本麵粉，小山園抹茶麻糬嘅餡料加入小山園抹茶粉麻糬同抹茶奶油，甘苦味會重啲，唔會淨係得個甜字，抹茶愛好者必試。另外仲供應髒髒朱古力麻糬、台灣桂花烏龍茶等多款口味。
散水茶 TEADDICT
散水餅唔一定局限於甜品㗎！跳出下框框，好似呢款掛耳茶包都幾有特色，獨立包裝，一共四款唔同散水感言，如「散水有相逢」及「拜拜你條尾」等～如果買埋淡奶就可以沖返杯地道港式奶茶添。如果身邊嘅同事都係怕肥嘅話，係幾適合。
圖: 餐廳官方網站
滋潤靚湯 SoupDay
其實散水派湯飲都幾好呀，湯有保溫袋裝住，就算跨區送都仲係暖笠笠，啱晒冬天呀！人氣湯飲包括花膠燉鮮奶湯、黑蒜螺頭燉湯同椰子雞燉湯，咁有心思同事一定感受到～
圖：文: Yanica
編：Kar