呢間本店位於觀塘嘅日式席前鐵板燒人氣爆燈，晚晚都坐無虛席，餐廳主打平民價日式鐵板燒，而且仲去埋灣仔開分店呀！灣仔新店地方更寬敞，座落於高樓大廈30樓，落地玻璃令景觀更開揚，更可一覽維多利亞港全景。菜單選擇方面豐儉由人，最平午市$340已經食到十道菜嘅套餐，以食物質素同個景嚟講真係超值。溫馨一提所有特選及海鮮套餐只於星期一至日 12:00 - 15:00供應。
美國牛肉特選鐵板套餐($340)
灣仔店獨有嘅優惠套餐！有齊10道菜，包括沙律、前菜、大蝦、牛肉、帶子/銀鱈魚/法國鵝肝 (三選一) 、季節野菜、炒飯、漬物、麵豉湯、雪糕或咖啡。而價錢係根據牛肉級數而定，由$340-$560不等。
最抵食嘅美國牛肉薄燒已經唔錯，將薄切牛肉放喺230度嘅鐵板上輕輕一燒捲起就食得，熟成程度啱啱好，入口軟腍，牛味亦突出，包住葱粒同乾蒜，香口之餘減低油膩感。大蝦亦新鮮彈牙。
套餐亦有海鮮食，可以喺帶子、銀鱈魚及法國鵝肝中三選一，銀鱈魚充滿魚油，一入口感受到香濃魚油香，魚肉亦夠滑身。鵝肝油脂同樣豐富，入口即溶，鵝肝亦大塊厚身。底下墊上麵包吸油減低膩感。
炒飯加入洋蔥、蔥粒、牛肉粒及蛋等材料炒香，乾身而且粒粒分明。
A5和牛特選鐵板套餐 ($560)
如果想食再靚啲嘅肉，推介厚切A5和牛，牛肉入口即溶亦充滿油脂香。套餐一樣有齊10道菜㗎！
海鮮套餐($340)
唔係太好肉類嘅朋友，海鮮套餐一樣$340就食到，包括主菜南非鮑魚、白鱈 魚、大蝦、前菜、沙律、季節野菜、炒飯、漬物、麵豉湯、雪糕或咖啡。南非鮑魚大隻兼新鮮，入口鮮甜彈牙！
晚市餐廳亦有供應幾款二人餐，共有 12 道菜，有齊刺身、肉類同海鮮，食材會更豐富。如果想用一個平民價錢去體驗一次日式席前鐵板燒，呢間餐廳係一個唔錯嘅選擇！
地址: 灣仔軒尼詩道256號The Hennessy30樓
文: Yanica
相、片: Tom Li