於2018年獲得米芝蓮一星榮譽嘅京都富小路やま岸可謂一位難求，喺日本就算預約咗都要等成個月先食到～最近呢間星級餐廳正式登陸尖沙咀新商場，香港店由二廚義井富明先生坐鎮，食材每日由日本空運到港，廚師會按照食材供應設計餐單，兼會喺客人面前即席製作每一道菜！

餐廳只設晚市，每晚舉辦兩場Omakase 廚師發辦套餐，分別由晚上6時至8時30分及8時45分至至11時，套餐每位定價為$2,500。共設11道菜式，等開飯仔介紹吓其中大部份招牌菜式啦。

先付 - 鮑魚糯米蒸

前菜鮑魚糯米蒸，廚師用上黑鮑魚同糯米，肉汁滲入飯中，有助開胃。

碗 - 甘鯛清湯

「先付」之後就係「碗」，類似開胃湯嘅意思。高湯選用松島屋嘅三款木魚花，配合特定嘅溫度同時間烹調而成，味道鮮甜。

杉八寸 -  燒鮎魚配粟米天婦羅

杉八寸原本係指用嚟盛載食物、長寬都係八寸嘅杉木盒，而家已成為懷石料理裡其中一道菜式種類。鮎魚係京都夏季著名嘅食材，大廚將成條魚燒至香脆，魚味濃郁。青森縣粟米天婦羅亦香甜。

壽司 - 海膽壽司

海膽控真係唔可以錯過呢個招牌海膽手卷，選用來自北海道嘅馬糞海膽及秋俵米，成排肥美海膽放喺壽司飯上，見到都覺得澎湃！唔單止視覺效果滿足，海膽亦入口即溶、新鮮鮮甜。

焚物 - 賀茂茄子田楽  

京都出產嘅「賀茂茄子」外形滾圓，肉質緊實唔硬，打破一般怕茄子嘅人對佢嘅印象。以山利白味噌及大德寺豆烹調茄子，茄子非常入味。

酢物 - 鰻魚水雲醋物

平時食鰻魚都係配鰻魚汁，呢度就改以醋汁伴靜岡烤鰻魚，一解油膩感。

焼物 - 近江牛燒物 /ご飯 -- 越光米及漬物盛合

選用近江牛，先以大火鎖緊肉汁，再以京都嘅萬願寺唐辛子調味，牛味較重。配埋長野縣越光米及配菜食就最就啱。

甘味 - 時令生果及「最中」

「最中」即係用米餅夾住北海道紅豆蓉嘅傳統和菓子，味道唔會過甜，為呢餐畫上完美句號～

富小路やま岸

地址: 尖沙咀梳士巴利道18號Victoria Dockside K11 Musea 5樓506號舖

文: Yanica

相、片: Tom Li