最近行過各區，都成日聞到陣蛋糕香，係古早味蛋糕呀。呢種來自台灣嘅傳統味道，同平時見開嘅蛋糕完全唔同﹕大大舊嘅長方形蛋糕，超有蛋香味，口感綿密而濕潤。早兩三年，有間嚟自馬來西亞嘅古早蛋糕店登陸香港，更一度成為IG打卡名物，可惜人氣過後，最終結業收場。今次再掀起嘅「古早蛋糕潮」，唔知可唔可以真正俘虜到香港人嘅心呢？
流心芝士蛋糕 麥蛋糕
圖﹕呢間位於西環嘅古早蛋糕店，店面普通，但一有蛋糕出爐，陣陣蛋香，真係唔留意佢都唔得！蛋糕店除咗原味，仲有抹茶紅豆味、朱古力味等！最受歡迎嘅味道就一定係「流心芝士」啦，鹹香嘅芝士醬唔會太膩，新鮮出爐個陣仲有拉絲效果添呀！
元朗新晉古早蛋糕 古早坊
圖﹕Co兒女、古早坊Facebook專頁
呢間古早蛋糕店推出原味、流心芝士味、金沙奶黃味等唔同口味嘅古早蛋糕，最受香港人歡迎嘅同樣都係「流心芝士味」，用咗香濃嘅紐西蘭巴馬臣芝士，再喺蛋糕上面灑上芝士粉，芝士嘅鹹香配上甜甜嘅蛋香，食落雙重享受！
近10款口味 古早記
圖﹕古早蛋糕唔一定原味、芝士味最好食嘅，呢間嘅古早蛋糕店就研發咗唔同口味，好似摩卡咖啡、大理石朱古力、海苔肉鬆等，味道有鹹有甜！每15分鐘左右就有一種口味出爐，食唔食到心頭好就好睇運氣喇！（可以睇定佢哋IG講嘅出爐時間嘅都）推介「大理石朱古力」，外表冇一般古早蛋糕咁樸素，一切落去有好靚嘅大理石紋，係爆漿朱古力呀！
絕對鬆軟口感 香綿綿
圖﹕聽呢間古早蛋糕店個名，就知佢哋嘅賣點係香綿嘅口感啦！共提供三款口味﹕原味、黑糖味、流心鹹蛋芝士味。食落真係比其他店嘅軟綿綿，黑糖味同流心鹹蛋芝士味分別食出淡淡嘅甜味同鹹香，一個人食食下好易唔覺唔覺就食晒。
Q彈又暖滑 古珐蛋糕
圖﹕嫌古早蛋糕太腍，冇乜口感嘅話，呢間蛋糕店或者可以滿足到你啦！食落有啲咬口，Q彈得嚟又有蛋糕嘅鬆軟口感！佢哋有原味、朱古力味、香酥肉鬆味同爆漿芝士味。排耐少少都抵！新鮮出爐嘅古早蛋糕入口暖滑，誇張到被人形容為「滑到似燉蛋」！
文﹕Kiko