離島美食介紹今次到大嶼山篇啦！開飯仔精選咗4間特色餐廳畀大家，假期去玩又有idea啦。
湖邊山景cafe The Hideout
圖：想同朋友搵間有靚景嘅cafe打卡，呢間有自然湖景同山景嘅cafe就啱晒你！餐廳設有室內同室外位置，室外直頭可以坐喺湖邊慢慢拎住食物打卡影相，連擺放食物嘅餐盤都好靚～主要供應咖啡、特飲、輕食同甜品等，如avocado toast、The hideout breakfast都色彩繽紛，靚之餘質素都唔錯；甜品就幾推呢個Banana Chocolate Toast，選用丹麥麵包多咗份層次，滿滿朱古力榛子醬同香蕉片，邪惡但好好味。
長沙泳灘海景餐廳 Bathers 
位於長沙泳灘海岸線嘅餐廳，主打西班牙同地中海風味美食，讓大家可以喺寫意海風下悠閒地享用美食。前菜有用自家製西班牙伊比利亞黑毛豬炸成嘅火腿炸丸子，香口惹味。另外當然唔少得海鮮菜式，香焗半殼帶子加入忌廉同白酒，肥美鮮甜；醃炸原條鱸魚用醋、蒜、黑胡椒同香料等醃製，酸酸哋幾開胃。甜品芒果椰子Trifle幾有特色，用芒果慕斯、椰子忌廉、金寶碎粒、青檸皮等層層堆砌而成，味道好豐富。
好味牛角包 Village Bakery
圖：zachs11
估唔到大嶼山都有好味嘅西式麵包店～裝修好有外國風格，主打手工麵包，人氣自家製酸種麵包，以酸種天然酵母發酵出嚟嘅麵包更有嚼勁，入面嘅合桃、杏脯同提子更添口感。另外手工牛角包都係必試items之一，外脆內鬆化，氣孔有層次感。佢亦有唔少中式麵包，如菠蘿包、雞尾包同墨西哥包等等，麵包控唔可以錯過啊。
必食巨型Pizza The Kitchen
圖：mifoodie
一大班朋友入大嶼山嘅話，去食薄餅就最啱喇！呢間主打巨型手工pizza，所有pizza都係即叫即製，首先佢哋嘅餅底好薄同脆，唔會食一件就好腬。口味方面推介蘑菇，有滿滿嘅大啡菇同黑松露油，味道超香！Four cheese都係另一招牌，食得出唔同種類嘅芝士，啱晒芝士控，大pizza仲可以揀兩個口味合併𠻹～
2024週末食盡離島！
長洲篇：（按此）
大澳篇：（按此）
南丫島篇：（按此）
文：Yanica
編：Cathy
