週末Brunch推介！Chill嘆假日 10間自助/無限暢飲早午餐

美好嘅一日，由一餐豐富嘅brunch開始！今次介紹10間自助式或無限暢飲嘅餐廳畀大家，有日本、巴西里約熱內盧同意大利等多個唔同國家嘅菜式選擇，實行每個禮拜快閃一個國家，就算晚市冇堂食冇咗dinner buffet，朝早一樣可以食好啲。

日式居酒屋酒吧 Musubi Hiro

呢間日式酒吧同時推出全新3道菜週末早午餐及兩小時無限暢飲套餐，除咗3款廚師發辦前菜及是日甜品，主菜包括鰻魚奄列、日式炸雞配鬆餅同150克牛扒配無限量薯條，另外更特意加入中西合璧嘅御結組合，加埋暢飲套餐可以盡情享用香檳、指定日本清酒、啤酒、雞尾酒、指定紅白酒同無酒精飲品，可以慢慢嘆～

供應時間：逢星期六、日及公眾假期，中午12時至下午6時期間

著名爵士酒吧 Foxglove

鍾意音樂嘅朋友，一定要去呢間著名爵士酒吧～佢哋推出結合現場DJ、雞尾酒同點心嘅全新週末早午餐，重開放星期日都有得食！點心包括涼伴青瓜、上海小籠包、麻辣小籠包，經典手工原隻蝦餃皇、碧綠帶子腸、炸蝦多士、炒豆苗、叉燒蝦炒飯同芝士漢堡春卷。另外一樣有兩小時任飲套餐，盡情暢飲優質紅白葡萄酒、招牌雞尾酒、精釀啤酒同蘋果酒。

供應時間：逢星期六、日，中午12時至下午6時期間

時尚日式料理 CENSU

香港人最愛嘅日本菜，呢個$688嘅7道菜週末早午餐可供2至4人享用～包括日本新鮮直送嘅刺身拼盤、金黃香脆肉質鮮嫩多汁嘅日式炸雞、以牛肉汁同牛骨湯熬嘅壽喜燒汁所煮成嘅和牛壽喜燒，重有用上鮮甜雪蟹肉煮成嘅蟹肉烏冬。兩小時盡情暢飲由小型釀酒廠搜羅嘅手工釀造清酒、葡萄酒到日本啤酒都應有盡有。

供應時間：星期六，中午12時或2時30分（每時段為兩小時）

巴西日本小酒館 Uma Nota

以里約熱內盧為主題嘅brunch，的確幾有特色，唔多地方食得到！餐廳本身概念就係以日式烹調方法處理巴西食材，大玩fusion菜，今次brunch menu都唔例外，包括新鮮青口、汁烤豬肋排、酥炸木薯餅同香蒜燒魷魚，啱晒配埋冰凍嘅巴西啤酒邊飲邊食。至於暢飲套餐可無限添飲有氣酒同啤酒，或者升級可以無限享用雞尾酒等飲品。順帶一提，餐廳今年會以一系列巴西唔同區域為brunch主題，里約熱內盧做到5月後，就會接住有聖保羅、巴伊亞等地區喇。

供應時間：逢周六日及公眾假期，早上11時半至下午6時

意式周末自助早午餐 ciao chow

位於蘭桂坊嘅意式餐廳，推出嘅自助brunch一向都好受歡迎，主力供應即烤薄餅同新鮮製作嘅意大利粉，呢度嘅薄餅係更香港唯一擁有VPN認證嘅意大利餐廳，VPN即係「真正的那不勒斯薄餅」，麵粉質量、水嘅pH值等都要合乎標準～食落特別鬆軟唔會有飽滯感！最近推出全新早午餐及無限量暢飲優惠，有凍肉拼盤、精選芝士、多款意大利配菜同沙律、新鮮海鮮、甜品等，烤肉當然唔少得。無限量暢飲選擇包括Prosecco氣泡酒、精選餐酒、啤酒、烈酒、特色雞尾酒等。

供應時間：星期六、星期日及公眾假期，中午12時至下午3時30分

坐擁維港景色中菜館胡同

呢間高級中菜館早前搬到新址，望到270°維港景色真係好加分。佢哋最近推出新升級嘅「丰味」早午餐，食盡泡椒蝦餃、煙燻鴨胸燒賣、竹炭魚香咸水角等點心，同山城辣子雞、煎鵝肝燻流心蛋等菜式。同時享受四個半小時無限香檳、雞尾酒、葡萄酒、清酒同啤酒暢飲！

供應時間：逢星期五下午2時30分至下午6時，以及星期六、日上午11時至下午1時30分

靚景加持意日料理 Aqua

呢間位於尖沙咀嘅意日菜餐廳出名有維港景致任睇，供應嘅Gold Room Brunch更無限量提供新鮮壽司、魚生、生蠔同披薩等，加上自選主菜及甜品拼盤夠豐富！再加上香檳、雞尾酒、葡萄酒、清酒同啤酒可享四個半個鐘無限暢飲。

供應時間：逢星期五下午2時30分至下午6時，以及星期六、日上午11時至下午1時30分

週末暢飲雞尾酒早午餐 Terrible Baby

海鮮控可以考慮下呢間位於酒店內、有露天位置嘅餐廳，呢個週末暢飲雞尾酒早午餐主打海鮮，推介焗紐西蘭生蠔配芥末沙律醬、迷你海鮮拼盤或大大份嘅海鮮漢堡，款款都鮮味十足㗎。而且2小時內可無限任飲多款招牌雞尾酒，包括Cry Baby、Porn Star Martini、Terrible Mary等，另外更有紅白酒、啤酒及烈酒選擇。

供應時間：逢星期六、日，中午12時至下午6時供應
供應日期：由即日至2022年2月27日