嚟緊下星期又會轉涼，打邊爐就暖身最好不過！繼一輪麻辣火鍋，今次新開嘅有椰子雞煲。呢間同仁四季來自深圳，老闆有多間以live music為主題餐廳，椰子雞煲就最出名，國內有十幾間分店，開足24小時。香港店開喺荃灣商場內，同樣有舞台，請來本地獨立音樂人表演，都幾好feel架。
店主講求養生健康，主打椰子雞煲，用上四個椰青、一個椰皇做湯底，選用泰國椰子，只加少少鹽調味，非常清甜！未淥配料之前一定一定要飲多幾碗！加埋珍珠馬蹄甜味更重，基本上之後加水已好夠味。
生態原味椰子雞鍋 $188/半份，$328/一份
海南文昌雞來自國內自家農場，每日直送，每隻約1斤重，養殖110日，食天然飼料亦經過走地，肉質嫩滑而且唔肥膩，雞皮亦都好爽彈。煲滾椰子水後，放入雞件再滾起，之後熄火焗6分鐘，雞肉質感就會滑溜唔老。
其他配料亦選用靚料製作，海鮮全部有魚缸養住，有柯打先即劏，活魚切片後上到枱仍然郁動，好生猛。豬肉選用西班牙貨，牛肉亦有日本熊本A5級黑毛和牛、安格斯及本地手切肥牛。
花金古 時價 (開業優惠價$568配一份安格斯肥牛)
魚肉嫩滑有魚味，更可作兩味，骨腩以椒鹽炮製，好香口。
紐西蘭蟶子皇 時價、頂級手切安格斯肥牛 （小） $198
蔬菜亦見特色，少有的寶塔菜、冰菜亦可以放湯淥熟，寶塔菜質感似椰菜花但更甜。冰菜食落爽得來滑，都幾特別，而豆苗選用更幼嫩的豆胚，香甜冇渣，吸收湯底甜味。
寶塔菜 $58、冰菜 $48
響鈴、丸類都係自家製，鮮拆蟹肉丸可見到蟹肉及蟹黃，甘香彈牙，燕液鵝肝蝦丸亦少見。
鮮炸響鈴 $48、極品鮮拆蟹黃丸 $148/8粒、極品燕液鵝肝蝦丸 $188/8粒
椰子雞配沙薑醬油最襯，配海鮮就可以點自製沙嗲醬，牛肉配日式柚子蘿蔔茸。不過湯底夠甜，其實食原汁原味就最好。
地址：荃灣青山公路荃灣段388號中國染廠大廈中染新城1樓106號舖
更多新店直擊： |
文、相、片：Perrins