嗱，唔係開飯仔咩嘢食都要加「邪惡」兩個字，但要講到麵包界嘅邪惡代表，一定唔少得呢間烘焙店嘅五層流心芝士軟包！最近佢地仲要出咗兩款新口味，一款加入芒果同熱情果，行小清新路線；另一款就用咗法國Valrhona朱古力，味道香濃。
 

麥上日光嘅五層流心芝士軟包一直都相當受歡迎，繼上年嘅芒果同紫薯等口味之後，今次就推出「當芒果戀上熱情果」同「芝朱俠」兩款期間限定口味。
 

「當芒果戀上熱情果」用咗春夏時令芒果同熱情果混入澳紐忌廉芝士，雪凍嚟食嘅話中間Cream Cheese口感似足Cheese Cake！
 

雖然唔係好食得出芒果同熱情果嘅獨特果香，不過勝在味道酸酸地幾清新。上面仲加咗紅莓乾，賣相加分之餘仲相當解膩。
 

「芝朱俠」就係五層流心法國朱古力芝士包，不惜工本特別選用法國Valrhona朱古力。可以用焗爐或者微波爐稍微加熱，朱古力香味更突出。
 

Cream Cheese食落有好濃郁嘅可可味，同芝士嘅自然微酸好夾。外面再舖一層可可粉，整體味道濃郁，比較容易覺得甜膩，建議搵多一兩個朋友開心Share。
 

文、相：Cathy