銅鑼灣糖街有唔少印傭聚集，好似成個小印尼，街上有好幾間印尼菜，最新嘅班蘭葉印尼美食由香港人Alex及印籍女朋友Susan開設，主打當然都係地道印尼菜。Susan來自印尼加里曼丹島，曾喺當地開設餐廳，一般香港人都於印尼菜嘅認知，就係印尼炒飯、indomie等，呢度供應嘅菜式更加地道，更由當地空運香料製作，由用印尼石磨自家製醬汁，味道夠晒正宗！
最特別嘅係印尼牛丸Bakso，呢種街頭小吃喺當地好流行，香港就比較少見。特別引入網球咁大粒嘅size，入面包住6粒迷你牛丸BB同肉碎，所以又稱大肚牛丸。牛丸唔似港式咁彈牙，但牛味都幾濃，配上麵條、辣醬等同吃，甜甜辣辣。
印尼牛肉丸湯 $68
另外一款拉翁牛肉湯都係Susan家鄉菜式，湯底黑掹掹，係用空運來港嘅黑果加牛骨熬製，雖然少少油膩，但牛味重兼有藥材甘香，用嚟配白飯都唔錯。
拉翁湯牛肉飯 ＄68
印尼炸魚飯用原條黑鰂魚炸成，配上用印尼石磨將蕃茄、蝦膏、辣椒自家製嘅醬料，非常惹味！炸魚外皮香脆，但肉質好滑，而且用香料醃過完全唔腥。炸雞飯則係啖啖肉嘅雞扒，又係炸得好juicy，超得！
炸魚飯 $58
炸雞扒飯 $68
健康啲可以揀斑蘭雞花膠雞粉皮，斑蘭雞以斑蘭葉、湯頭浸熟，時間掌握得剛剛好，肉質超嫩滑。加埋薄身滑溜嘅粉皮同埋大塊花膠，成碗粉都好幼滑。
斑蘭雞花膠雞湯粉皮 $68
斑蘭湯丸、車輪餅等小吃都係用新鮮班蘭葉，全天然唔係加色素，甜度亦遷就香港人，唔會過甜。
斑蘭湯丸 $68
其他食物都好用心，沙嗲醬有粒粒花生，即叫即燒。質素高而且好抵食，唔怪得咁多印尼姐姐幫襯啦。
地址：銅鑼灣糖街1-5號銅鑼灣商業大廈地下B2舖
文、相、片：Perrins