火鍋迷要注意啦，銅鑼灣有新場，主打日式火鍋放題，食物款式多不在講，最重要係不！限！時！如果你傍晚5點半入去食，可以不限時任食至夜晚11點，平日火鍋都要急急腳即刻食完走人，吹水都唔夠盡興，呢個新場絕對啱晒gathering喇！

湯底有好多選擇，有日式壽喜鍋、韓國人參雞鍋、血池地獄麻辣鍋、沙茶擔擔鍋、山地野菌清湯鍋、溫野菜蕃茄鍋及黑蒜油豬骨鍋，加$28就可轉鴛鴦鍋，試到兩款湯底。加$60可以升級至波士頓龍蝦鍋或蕃茄野菌蟹鍋。7位以上可揀選兩款湯底。

柯打完湯底後，餐廳會先送上兩款珍味小食、鰆魚魚皮唐揚、稻荷腐皮卷唐揚、帆立貝黃金燒、四品刺身盛合、象拔蚌刺身、海鮮盛合、自家製雙目水餃、極上手切牛小排及三色海鮮丸。

四品刺身盛合會視乎供應量而定，採訪當晚有三文魚、吞拿魚、甜蝦及北寄貝，味道尚算鮮甜；而象拔蚌刺身都幾爽口。

而海鮮盛合就有脆魚鯇、脆魚腩、貴妃蚌、刀貝，海蜆、蠔、蝦。

貴妃蚌肉、刀貝肉都幾大粒，食落啖啖肉，正！

帆立貝黃金燒，用芝士燒至焦香，再加上蟹籽，口感豐富。

三色海鮮丸包括鯪魚滑、蝦滑及墨魚滑，好彈牙。

部分海鮮、肉類都可以免費追加，有：美國穀飼肥牛片、牛國穀飼黑豚肉片、農場鮮雞件、極上羊肉片、脆肉鯇魚片、脆肉鯇魚腩、鰆魚魚皮唐揚、稻荷腐皮卷唐揚及鮮海蜆。

雖然肥牛雪花唔多，但幾有咬口，牛味亦濃。

除此之外，餐廳仲有配料區，可任揀三十幾款火鍋配料，包括牛丸、迷你墨魚丸、迷你貢丸、龍蝦丸、午餐肉、芝士腸、一口台灣腸、芥末包心丸、白菜仔、娃娃菜、香芋、皇帝菜、唐生菜、油麥菜、菠菜、粟米、白蘿蔔、豆卜、冬菇、南瓜、杏鮑菇、雲耳、冬瓜、芋絲、響鈴、炸魚皮、即食麵、烏冬、生麵等等等等。

另外亦有熱盤，採訪當晚有豉椒炒蜆、香煎牛柳粒、糯米飯、星洲炒米，連螺頭雞湯都有，勁！

現場亦見有少量甜品、啫喱、水果供應。

雖然係雀巢雪糕，不過有成5款口味咁多，都OK啦！

自助配料區都有十幾款選擇，除咗普通豉油，仲有胡麻醬、豆瓣醬、麻辣醬、沙爹醬、指天椒、炸蒜、紅椒絲、蔥花、芫茜、唐芹及生蒜。

飲品有汽水機及果汁機，仲有十幾款紙包飲品及罐裝飲品，又有竹蔗茅根及酸梅湯健康飲品。

水泥牆、灰色水泥枱面、色彩繽紛嘅光面凳，加埋牆上嘅車牌、標誌裝飾，好有工業風格。

餐廳而家仲做緊新張晚市優惠，晚市惠顧額外再有88折，即係每位平均$240有找，好抵食！

火鍋放題價錢：
（星期一至四）成人$268/位、
（星期五至日、公眾假期及其前夕）成人$298/位
1.3米以下小童半價、90cm以下小童免費、每晚9點後入座可享8折優惠、另設加一

千賀水產の鮮鍋道場
地址: 銅鑼灣霎東街33號智選假日酒店3樓

文：Joy