想食澳門菜，搭船過一過大海係幾方便嘅，但當然唔及過一過海去轉銅鑼灣快啦~ 銅鑼灣最近開咗間澳葡菜餐廳呀，將傳統嘅澳門特色食品再加以創作，好似豬扒包就變成乳豬包，水蟹粥就加埋海膽醬等，充滿新鮮感；仲有個下午茶Tea Set都好吸引。

講起澳門，一定會諗起豬扒包，而呢度嘅大廚就將豬扒變咗做乳豬，仲要只係揀2公斤嘅西班牙乳豬，用十幾種香料醃完再風乾，烤到層皮勁脆，係就咁睇都已經feel到佢嘅脆嗰隻。重點係，幫你起埋骨呀！食落啖啖都係肉勁方便，食得辣嘅話記得要加埋自家製嘅葡式Piri piri汁，係葡式辣醬混入沙律醬，微辣。

水蟹粥係澳門另一樣標誌，平時食都已經覺得好綿好鮮甜，而家呢？升lvl咗做極品海鮮蟹皇粥！有幾極品？加埋蜆肉，未夠！仲有自家製，用蟹膏、海膽、鹹蛋黃炒成嘅海皇醬，倒埋落粥度，色水更橙黃，味道亦更香口。

呢個兩人份嘅tea set都係各位搵地方high個tea時嘅一個唔錯選擇，有豬扒包、芝士馬介休、炸手打墨丸餅、黑醋乳豬手、葡撻同木糠布甸。基本上，去澳門必食嘅嘢呢個set都佔咗大半。

介紹下甜品先，木槺布甸除咗有原味之外，仲有幾款其他味，其中最特別嘅應該就係呢個杏仁餅味喇！次次去澳門都總係要買返幾盒返嚟嘅杏仁餅，而家成大塊就插咗喺杯布甸度，至於「木糠」，亦係由平時嘅馬利餅加杏仁餅碎混製而成，又幾夾，幾香口喎。

澳門另一樣經典甜品係Batatada（薯仔蛋糕），餐廳嘅葡式暖心甜薯蛋糕現蜜糖乳酪，除咗用薯仔之外，仲加入埋用蜜糖煮過嘅蕃薯，件cake上面真係有一粒粒甜薯喺度，份外香甜，而且好有實在感。

 葡式水果酒（Sangria）

小島•澳門菜
地址：銅鑼灣勿地臣街1號時代廣場13樓1302號舖

文、相：Kar