邊個話夜晚先至飲得酒？日光日白一樣飲得。尤其是而家6點後冇咗晚巿堂食，想要飲到杯新鮮生啤，就更加要日頭去飲喇。旺角有間人氣精釀啤酒店，最近喺銅鑼灣開多間分店，新店舖位大啲，提供嘅食物種類多啲；有室外樓梯吹水位，仲有埋個標誌嘅旋轉木馬打卡位。就算同行朋友中有人唔多飲啤酒嘅，都一樣食得自在。

如果熟客去到，就會感覺到呢度同旺角店係兩種截然唔同嘅風格，旺角店走嘅係輕工業風，銅鑼灣呢間舖就營造到一個啤酒嘉年華嘅感覺，除咗有幅大型嘉年華嘅壁畫之外，喺bar枱頂亦有旋轉木馬裝飾，relax得嚟仲好啱打卡。唔講唔知，原來旋轉木馬係由老闆自己親自畫圖，再搵廠商製作，甚至有好多材料都係老闆去搜羅返嚟畀師傅裝嵌呢。

 酒吧合伙人之一，Patrick

酒吧合伙人之一嘅Patrick話：「我哋最初有請設計師，但最後嘅設計同我哋想像中有出入。後嚟我同拍檔都參與咗好多設計上嘅工作，或者親自落手落腳做，因為始終有咗第一間嘅經驗，我哋覺得有啲嘢可以靠我哋自己雙手去做，咁我哋就自己做，包括Tap System都係我哋自己裝嵌嘅！」Patrick認為酒吧唔一定要黑沉沉，所以佢哋嘅裝修都係比較colourful啲、光猛啲。希望大家可以嚟到享受啤酒，同埋輕鬆傾下偈。

 焗手工啤啤雞

餐牌方面，薯條、雞翼等佐酒小食當然唔少得，另外亦多咗啲飽肚啲嘅正餐美食，有lunch menu亦有weekend brunch menu。最推介嘅一定係以酒入饌嘅焗手工啤啤雞，加入特選嘅精釀啤酒製作，低溫慢烤煮熟隻春雞之後，再以高溫處理。外皮脆卜卜，嗒落仲有陣陣甜香同酒香，而雞肉依然滑嫩。

 厚切日式叉燒配脆炸芫荽fusion漢堡

芫荽黨員就梗係要試厚切日式叉燒配脆炸芫荽fusion漢堡啦，日式叉燒入口鬆軟，炸過嘅芫荽唔算好重口味，但就好脆口，夾埋一齊食絕對係一種享受。

 龍蝦Madnedict

Weekend brunch 方面，推介兩款常見得嚟又花咗少少心思嘅嘢食。龍蝦Madnedict即係egg benedict嘅變奏。面頭嗰隻「啷下啷下」嘅溫泉蛋，以65度慢煮過；肥美嘅澳洲龍蝦尾，則以白酒同蔬菜高湯烹調過，肉質爽甜。放底嘅麵包，一個係天然酵母製嘅酸麵包，一個係脆卜卜嘅炸饅頭，口感豐富，各有風味。

 肥東波與脆窩夫

而肥東波與脆窩夫則係另一道fusion菜式，窩夫即叫即做，蛋漿都係自家調製，外脆內軟。東坡肉雖然肥仔，但係間中放肆一次半次冇緊要啦~ 呢嚿肉鹹中帶甜，軟腍又冇膩感，搭埋隻蛋上去再篤穿佢，流啲蛋汁出嚟，又治癒又滿足。

 我不想滷力了拼盤(左)、Timewarp Jukebox / NEIPA (右)

啤酒夾滷味，好似有少少麻甩，但係當個「我不想滷力了拼盤」係用咗祖傳秘方去炮製滷汁，豆腐、鴨腎、雞翼、豬耳吸收晒香濃嘅精華，而杯NE IPA嘅果香又非常突出時，麻甩都變咗麻吉嚕。介紹返呢杯係嚟自挪威酒廠Amunden Brewery嘅Timewarp Jukebox，用咗成六款啤酒花去冷泡同釀製，啖啖都係蜜桃、菠蘿、柑橘等嘅果香。

 Blackcurrant Tart / Sour Ale (Fierce)

 Black Wave / Baltic Porter  (H.K. Lovecraft)

呢度有成28個Tap頭，酒款當然包羅萬有，主打當然係多款獨家進口嘅外國啤酒啦。蘇格蘭酒廠Fierce嘅Sour Ale——Blackcurrant Tart呈暗紅色，同樣都好juicy，係酸酸甜甜嘅黑加侖子味，感覺refreshing。而冬天特別啱飲黑嘢，推介本地酒廠H.K. Lovecraft嘅Black Wave！呢款Baltic Porter層次豐富，先有陣陣香濃嘅烘烤麥芽香，同甜甜嘅焦糖、拖肥、朱古力味，嗒真啲仲有淡淡藍莓香，絕對值得一試。不過酒藏有限，賣晒就會轉咗其他款式咯。

 外賣生啤

可能你會話6點後冇堂食喎而家，唔緊要，佢哋有做外賣，連生啤可以外賣呀。斟入罐拎返屋企慢慢飲一樣得！另外，遲少少仲會有埋雞尾酒，或者無酒精飲品供應呢~

The Madhouse CWB | Taproom • Kitchen
地址：銅鑼灣禮頓道29號華懋禮頓廣場地下2號舖

文：Kar
相、片：Tom Li