星期五六，梗係要去happy hour飲返杯啦！銅鑼灣耀華街有唔少酒吧，不過就冇乜特色可言，新開嘅手工啤酒吧賣点就一洗頹氣，門面格局都夠潮夠young，門口鮮黃色鐵閘、地下印住「好酒不見」同大大隻字「歡迎露點」霓虹燈，非常IG-able！
舖頭同人氣甜品舖ZUC.CCH.ERO係姊妹店，不過成個concept都好唔同。呢度走本土文化同情懷，懷舊燈掣、鐵皮信箱同寫滿廣告金句嘅牆身，粗口區、嚴禁放屁等搞笑標語，香港人實有共鳴。
飲酒有免費街機任打，後面仲有一大個露天秘密花園，有大大個豆豆梳化任攤等人好似返咗屋企飲酒咁輕鬆自在，唔使咁拘謹。店主Karen仲話，將來亦希望同唔同界別嘅藝術家crossover，做展覽、工作坊等，將本地嘅文化推廣出去，更加有趣。
餐牌飛行棋設計，啤酒最少有50款，主要係本地同台灣品牌，本地嘅有啤酒迷都好熟悉嘅門神、麥子、Heroes、鬼佬同大圍啤，大約25 款。最新嘅財神柑桔啤都有供應，有柑桔清香。另有唔少歐美果味cider，好適合唔鍾意飲啤酒嘅女仔。推介意大利Salinae，樽身似香檳咁優雅，清新味淡。遲啲會引入生啤、雞尾酒等，fit晒唔同人嘅口味。
門神財神柑桔啤 $69
大圍啤伯爵茶、檸檬馬鞭草 $64
Birra La Coota Salinae $74
台灣陣容就犀利喇，品牌同款式不定，因為大部分都係自己搵然後入貨，香港唔係度度都有架。品牌比較小眾啲，每次只入少量款式密密換，可以成日嚟試吓新貨。
55街愛吧 $89
好似五十五街、禾餘麥酒、基隆潮境啤酒等，台灣艾爾有桂花糯米、土肉桂地瓜啤酒等口味，都幾獨特。試過地瓜啤，肉桂味濃而香甜，而基隆風土潮境啤酒加咗海藻製作，味道清爽。鍾意重口味，呢度亦有唔少黑啤同IPA，好似水鹿精釀嘅野豬咖啡牛奶波特，有咖啡香，入口順滑。
台灣艾爾土肉桂地瓜啤油、桂花糯米啤酒 $84
禾餘麥酒硬紅春麥酒、台11 IPA 、水鹿精釀野豬咖啡牛奶波特 $84
風土潮境啤酒 $84
食物方面就簡單啲，佐酒小食有自家製嘅焦糖竹炭爆谷、白甘筍片，白甘筍片炸過仍然清甜，幾健康。而芝士肉丸、香草雞翼就係ZUC.CHE.ERO都有嘅小食，墨西哥脆片自家製，似雲吞皮鬆化。雞翼輕過慢煮，肉質軟嫩入味，亦有即燒串燒都好惹味。
自家製鮮白甘筍片、竹炭焦糖爆谷 $29
慢煮香草蜜糖雞翼、芝士肉丸配墨西哥脆片 $80
不過飲到夜一夜，講到最佳comfort food，當然係餐肉出前一丁啦。有人半夜三更煮個麵你食，係窩心嘅。
沙嗲牛肉串 $20/串、餐肉出前一丁 $38
地址：銅鑼灣耀華街26號地下
文、相、片：Perrins