獅城出名地道美食多，海南雞飯、喇沙、肉骨茶、胡椒蟹等，仲有宮保田雞粥都好出名架！有好幾間人氣店位於芽籠，係當地人同遊客嘅宵夜勝地！而家唔使飛新加坡都食到，因為呢一道名菜已經落戶銅鑼灣登龍街喇！
新店宮保主打砂鍋宮保菜式，由藝人陳伶俐老公劉頌銘開設，劉生為新加坡華僑，係田雞粥名店常客，索性請埋大廚第一代主理人龍師傅過檔，炮製宮保田雞粥！
為忠於原著，砂煲都係於新加坡特別訂造運來港，比一般煲仔厚身，質料較靚，保溫力強。製作宮保菜式嘅高壓煤氣爐，火力夠勁及高溫，可以快速煮煲仔，上枱時熱辣辣到冒晒煙。
田雞粥用新鮮活牛蛙，每隻4兩左右，大隻又厚肉，而且肉質結實嫩滑。唔係個個都食田雞，另有八款唔同配料，包括牛肉、魷魚、雞肉、豬肋骨、鮮菇鰻魚、大蝦、花膠豆腐配雜菌及肉蟹，比新加坡店更多選擇，唔同配料味道都有少少分別。
砂煲宮保田雞 $148(細)、$268(大)
不過主角其實係個醬汁，係龍師傅由新加坡店沿用廿年嘅秘方，得佢識得整！每日用二三十款材料煮成，師傅唔肯透露做法，醬汁呈深啡色，食落似甜豉油但更有層次，加埋指天椒帶微辣，好惹味。新加坡人食得更辣，香港就可以揀微辣小辣。醬汁以高溫煮到收水，有一層醬汁包住食材，都幾入味。
砂煲宮保花膠豆腐配雜菌 $198(細)、$288(大)
地道食法係一鍋宮保田雞、一鍋白粥。白粥純粹得米同水煮成，大廚要手攪足45分鐘，質感好綿滑！記得先食一啖原味，之後將田雞連醬汁撈入白粥，即刻變得濃郁惹味！連新加坡食客試過都話味道同當地一樣。唔配粥亦可以配飯、油麵同米線。
除咗砂煲宮保菜式，仲有一系列粵式小菜，大廚曾喺香港麗思卡爾頓酒店工作嘅發師傅主理。有手工菜好似蜜餞桂花鱔、美人腰果龍蝦、川椒燒蝦球等，仲有配粥最夾嘅鬼馬油條，用手打墨魚同蝦膠，放喺自家製油炸鬼上面。黑胡椒蟹都係星洲style，用越南肉蟹製作，唔走油原隻生炒，醬汁入味之餘保留到蟹鮮。
黑胡椒蟹 $398
乾坤油條 $68
蜜餞桂花鱔 $138
鬼馬韭菜花炒牛肉 $118
地址：銅鑼灣登龍街36-48號登輝大廈地下E-F號舖
文、相、片：Perrins