近年越嚟越多人食素，「阿水」司徒瑞祈今次開新店賣車仔麵，亦特別新增素食選擇，同窩心素菜湯：每朝親自去街市揀最新鮮靚菜熬煮，無添加啖啖天然甜味！除咗車仔麵，亦有人氣秘製滷肉飯同多款小食選擇，西貢街坊有食神啦。
 

暱稱阿水嘅司徒瑞祈最近開咗間車仔麵店，主打窩心素湯車仔麵

車仔麵By阿水廚房顧名思義，係慈雲山阿水廚房嘅分店，繼續由阿水主理，不過今次就主打車仔麵。阿水指慈雲山店反應唔錯，穩定落嚟就想開多間，今次就特別返到去自己住咗十幾年嘅西貢清水灣道，係因為唔少街坊都話呢邊無乜嘢食，連附近科技大學嘅同學都想阿水哥哥喺呢邊開間餐廳，所以阿水就揀咗喺呢邊開店喇。
 

五餸車仔麵（$50）

為咗身邊嘅素食朋友，阿水特別設計出呢個窩心素湯車仔麵。湯底材料係阿水每朝經過街市嘅時候特別去菜檔挑選最新鮮嘅，所以每日都可能係唔同口味。阿水透露另一秘訣係加少少腰果或者栗子，咁樣就算唔加任何油或鹽，都會出奇地有少少肉味嘅感覺！
 

配料同樣用心，例如呢碗就有淮山、粟米、蘿蔔、冬瓜、紫菜，前幾款都係唔少人打邊爐會食，但喺車仔麵店又未必搵到嘅，阿水就覺得不如加埋落Menu畀大家揀。紫菜係阿水嘅推介，特別揀比較厚身嘅，食落「索」一聲有類似響鈴嘅口感，但味道就係紫菜嘅鮮味。
 

四餸車仔麵（$42）+自家製蠔汁炆花膠（$12）

素食以外嘅選擇亦有唔少，特別推介嘅配料係自家製蠔汁炆花膠，大大件花膠軟滑入味又唔會太爛太腍，食落膠質口感豐富。雖然唔算好厚身，但呢個價錢嚟計收貨有餘。配以昆布原味湯底鮮味啱啱好。
 

其他配料例如滷水雞翼同蠔油冬菇都係自家製，墨魚腐皮卷同響鈴亦有水準。心大心細唔知點揀好？呢度仲有個唔洗諗學生餐（$35），著校服或者出示學生證就得，由阿水哥哥幫你揀四餸車仔麵，再送一支嘢飲，想快手食個Lunch就最啱。
 

秘製滷肉飯（$24/迷你版，另有$40/成人版）

慈雲山店人氣秘製台式滷肉飯帶埋過嚟新店呢邊，阿水指呢碗滷肉飯嘅食譜係自己同朋友一齊研發，仲去過台灣考察，再觀察香港食客嘅反應，最後調整出而家嘅黃金配方。
 

貼士係要用台灣指定牌子嘅醬油，同埋要加八角去煮醬汁。味道比台灣普遍食到嘅無咁鹹，帶少少甜味撈飯食最啱。阿水話知道唔少同學仔係無飯不歡嘅「飯桶」，所以特別分可以當小食嘅迷你版，同當正餐嘅成人版。
 

 

三色薯餅（$20/5件）

小食仲有呢款三色薯餅，三色即係粟米、紫薯、咖喱，粟米有粒粒粟米粒口感，紫薯微甜帶少少纖維口感，咖喱味就惹味得嚟唔太辣。加上炸得金黃香脆唔油膩，係唔錯嘅香口小食。
 

自家製黑糖冬瓜茶（惠顧車仔麵+$9）

黑糖冬瓜茶亦係每日新鮮熬煮，係特別為香港人調整過嘅少糖配方，阿水希望喺足料同少甜當中搵到中間點，好味之餘又健康。冬瓜茶有消腫去濕、清熱降火嘅功效，難怪成日都好快賣晒！
 

（左）冰蜜桃（$12/2件），（右）冰菠蘿（$8/件）

連懷舊小食冰菠蘿同冰蜜桃都有得食！老實講味道就無乜驚喜，都係大家可以想象到嘅。不過可以懷緬下細細個去小食部或者士多買冰菠蘿嘅時光，同時消下暑吖嘛。
 

訪問期間演員陳琪亦嚟捧場，喺呢度真係隨時見到唔同明星㗎！

車仔麵By阿水廚房
地址：西貢清水灣道大埔仔村9號地舖

文：Cathy
相、片：Tom Li