掃街係唔少香港人都好喜愛嘅動作，每區嘅掃街小食都各有特色。而嚟緊幾日嘅長假期，如果無Plan到去旅行，又或者無Book到靚餐廳嘅話，不如簡單啲，試吓偶爾放慢腳步，一齊入坪洲，邊掃邊Hea邊放鬆。
雖然坪洲地方唔大，同其他離島相比之下亦唔算熱門，但就因為咁先可以保留住小島嘅悠閒寧靜。入到嚟唔使諗行程㗎，隨心周圍行吓，搵吓啲隱藏喺橫街窄巷嘅小店，已經可以享受到慢活一日嘅感覺了～
懷舊冰室海蝦多士 祺森冰室
喺坪洲開業40幾年嘅經典舊式冰室。行過見到門口有張綠色大長櫈就係啦！張櫈可以畀人坐住等食之外，仲啱晒畀文青喺度打卡影相。影完記得食埋呢度嘅名物蝦多士，先好走啊～普遍做法嘅蝦多士通常係將蝦肉剁碎成蝦膠，再夾喺麵包入面然後拎去炸。 但呢度嘅做法係將蝦肉直接放入切成三角形嘅方包， 再喺最面嗰層加啲麵包糠先拎去炸。 𥚃面有成幾隻新鮮海蝦喺度真係啖啖都有料！
簡單滋味芝麻餅 麵包舖
呢度賣嘅包餅都係細個喺傳統舊式餅店見慣嘅款式。但估唔到嘅係，咁平凡嘅麵包舖（個名都好平凡～）竟然有樣嘢食係好食到啲人會特登買返屋企或者做埋手信嘅芝麻餅！芝麻餅形狀同厚薄都有不一，充滿手工製作嘅感覺。餅身色澤金黃，餅面仲鋪滿白芝麻，脆卜卜之餘亦充滿芝麻甘香。即買即食梗係最好啦，但都有唔少人買幾塊返屋企慢慢嘆㗎！
離島區必食茶棵 德興士多
唔知點解，離島士多一定會有茶棵賣，而且通常比出面多款，呢度仲要熱辣辣喺蒸籠入面起出嚟。茶棵款式有眉豆、南瓜同雞屎藤，南瓜茶棵皮薄煙韌，入面嘅紅豆蓉亦唔會太甜。好彩嘅話仲有啲「期間限定」口味！通常都係老闆咁啱有材先會整。仲有出面少見嘅黑芝麻味砵仔糕，煙韌控真係要買返幾個先好走！
行山友至愛炸物 華記小食
圖：AdrianWong2011、billyleung722
唔少喺坪洲行完山嘅朋友都推介嘅小食店，主要都係嚟食炸雞脾，勁得意嘅原隻炸蝦餅等惹味小食。仲話啲炸嘢嘅火喉炸得啱啱好，唔會炸到老哂咁。而最特別嘅就係呢度連炸油池（即係蘿蔔絲餅）呢種舊派小食都有！一啖咬落去酥脆既外皮，入面就係Juicy嘅蘿蔔絲餡，好味又飽肚。
炸魚薯條進化版 金源冰室
圖：花太郎
Fish and chips就食得多，Fish and toasts 你又食過未？雖然呢度都係一間傳統冰室，但係居然有樣反傳統嘅嘢食，就係炸石斑魚配多士，如果想再潮啲可以配西多士，仲更加港式！大大份嘅炸魚炸得夠脆，而且咬落肉質嫩滑唔乾；多士亦夠脆身，唔會軟腍腍；一啖多士一啖魚，再加埋杯凍奶茶，真係好滿足。