雲吞麵鋪唔可以係全港最好嘅餐廳？

最近，雲吞麵BB心情應該好鬱悶，作為本港最具特色美食之一，受盡萬千寵愛，竟然被自家兒仔嫌棄出身草根，真係聞者傷心、聽者流淚。雲吞麵何罪之有？開飯仔宜家嚴選五間食雲吞麵好去處，證明雲吞麵鋪都可以係全港最好嘅餐廳啊～

溫情街坊生意　　盛記盆菜&盛記麵家

Photos by Mohkc & Ring_ochi
推介除咗因為食物高質外，仲有佢嗰份難能可貴嘅溫情。為咗回饋社會，老闆會喺每月農曆十六派麵俾長者食。而且佢將一啲睇落冇用嘅物品廢物利用，變成一件件藝術品裝飾店舖，令店內充滿懷舊氣息。

雲吞麵方面，雲吞皮薄肉多，鮮蝦豬肉餡肉質新鮮，唔會硬實實咁。鍾意食肉嘅可以叫個牛腩雲吞麵，牛腩煮得軟稔，牛汁撈埋啲湯底，味道更上一層樓。

OpenRice正評爆燈　　劉森記麵家

Photos by 井底龜龜
劉森記係老字號食店，佢做嘅雲吞麵喺飲食界都薄有名氣，店外總係大排長龍。雲吞麵湯底清甜，雲吞則有原隻蝦仁，再加上混入大量蝦子嘅豬肉，令整個雲吞蝦味十足。唔單止係咁，店家仲人手以竹昇壓麵，所以麵條食落零舍有嚼勁，最特別係仲帶點鴨蛋香。

師傅即場造麵　　黃枝記

Photos by Haha_panda & Sammilopy
黃枝記標榜手打麵，店內有間工作室，如果你好彩撞啱時間，就可以透過玻璃窗見到師傅喺入面用竹昇壓麵，欣賞到造麵呢種傳統手藝。雲吞麵係店內鎮店之寶，因手工製造關係，麵條彈牙爽身，去咗浸鹼水味，取而代之嘅係濃濃蛋味。雲吞方面，鮮蝦同豬肉係3:7，蝦肉來自緬甸，鮮口爽脆。

中環平價之選　　沾仔記

Photos by Gourmet KC
店內簡簡單單擺放幾把木凳木檯，天花板掛著幾個中式吊燈，好有客棧感覺。雖於位於租金高昂嘅中環，但一碗雲吞麵先28蚊，簡直就係中環打工仔嘅恩物。價廉同時，物亦美，呢度啲成個乒乓波咁大，湯底用大地魚同羅漢果熬成，所以味道鮮甜，非一般味精湯可比。

連續7年當選米芝蓮一星食府　　何洪記

Photos by 糖小妹
一般麵店都係地鋪，而且裝潢簡單，但係何洪記就一反傳統，以金色同白色作主色系，設軟席雅座，座位背後吊掛著Tiffany blue嘅燈籠，睇落好貴氣。作為連續7年得到米芝蓮推介嘅食府，水準緊係有番咁上下。呢度雲吞麵就算你放喺度一排，麵條都依然彈牙，湯底仲有蝦籽嘅味道，好香好香。

睇完咁多間餐廳開飯仔會話，食物無分貴賤，只有用心製作嘅都會係美食，而嗰間餐廳都會係最好嘅餐廳。

文: 段

隨時接收最新資訊
讚好OpenRice專頁！