香港有唔少台式飲品店，想突圍而出當然就要有特別之處。尖沙咀最近就有一間由台灣紅到去日本嘅茶飲品牌開幕，招牌「光飲系列」有夢幻漸層賣相，另外亦有各式手作珍珠飲品同清爽鮮果特調等選擇，話唔定就係下一間排隊熱店。
 

嚟自桃園嘅鹿角巷喺台灣有超過20間分店，之後去到馬來西亞、東京表參道及新宿、同澳門等地開業，而今日開始大家只要去尖沙咀都飲得到！
 

賣相最搶鏡嘅一定要數到招牌「光飲系列」，每樽都係即叫即製。「北極光」嘅藍紫色賣相非常夢幻，主要材料有蘋果醋、提子汁沙冰同碟豆花茶，利用食材天然顏色加上碎冰營造漸層效果。
 

「晨曦」同樣有蘋果醋同碟豆花茶，中間嗰層就變為芒果汁沙冰。因為碟豆花茶無乜味道，主要都係蘋果醋同果汁嘅酸甜味。建議相機飲完之後搖勻嚟飲。
 

另一推介就係「黑糖鹿丸」系列，每粒珍珠都係用自家麵團手揉成形，食落特別Q彈。每日用台灣嘅黑糖熬煮2小時，而且熬煮完成後唔會擺放超過3小時，令客人既食到黑糖嘅餘韻，亦確保珍珠係最佳口感。
 

「黑糖鹿丸鮮奶」用嘅日本明治牛奶，搭配煙韌有甜香嘅珍珠。可以先飲一啖底部黑糖珍珠，等黑糖嘅甜香充斥口腔，再飲一啖牛奶，感受過兩種味道衝擊之後最後搞勻享用。不過大家記得注意，「光飲系列」同「黑糖鹿丸」系列同樣每日限量發售唷。
 

招牌推介仲包括賣相得意嘅「盆栽奶茶」，喺珍珠奶茶上面放上朱古力曲奇碎同薄荷葉扮盆栽，啱相機飲先之餘仲增加口感。
 

而「抹茶牛奶」係香港店限定，同樣係即叫即製，由店員手泡日本抹茶粉，加上牛奶後一樣有相當亮眼嘅漸層賣相。
 

如果想飲清新啲嘅話，咁就可以考慮試返杯「白桃烏龍 」，聞落有白桃甜香，但飲起嚟就以烏龍茶嘅醇香餘韻為主。不妨點無糖，更可以突出茶香！
 

另一清爽之選係「戀香奇異果」，用新鮮原粒奇異果加百香果（熱情果）醬打成酸甜沙冰，底部仲有一粒粒珍珠，口感層次豐富。
 

飲品唔少原材料都係嚟自台灣，當然除咗番石榴之外鮮果就選用香港新鮮水果啦。而家大家唔洗飛台灣一轉，都可以將一杯特色台式飲品隨時買走。

鹿角巷
尖沙咀彌敦道27-33號良士大廈地下F舖

文、相、片：Cathy