條街愈嚟愈少人，望入餐廳就更加空豂豂，生意慘淡。有餐廳選擇休店停業，亦有唔少餐廳繼續想盡辦法求存，諗計出招自救，除咗之前同大家介紹過嘅分區團購食物服務（傳送門按此），另外有啲餐廳就決定轉型賣兩餸飯、增設糖水副線，甚至增設大廚上門服務！
Bistro Wellington Fusion多國菜➡️日式咖喱
圖：JoyfullFoodstagram、ChiChungTsui
前排先重返中環開業冇耐嘅Fusion多國菜餐廳，喺Facebook表示「想生存，就唯有求變」，最近轉型做日式咖喱專門店，以大量蔬果同傳統日式烹調方法煮製咖喱，味道份外香甜。咖喱吉列豬扒飯啖啖肉，外皮炸得鬆脆香口，好鬼惹味。btw佢哋都有團購服務，九龍灣嘅街坊可以留意下(按此)，3月5日截單。
Favilla Café 日式西餐➡️車仔飯
圖：MH Chan(fb) 、餐廳Facebook
原本主打日式西餐嘅小店，最近賣埋車仔飯，單餸飯$38，三餸飯都係$52，買滿$50仲有糖水送。每個禮拜都會換menu，今個禮拜嘅選料有椒鹽豬扒、炒西蘭花、滷水豬手同水煮魚等等，堅決「不設頹飯」。仲有，餐廳兼做埋火鍋團購，可以訂埋湯底同配料添。
GOTTHARD BASE Restaurant & Lounge 正宗西餐➡️港式焗豬飯
圖：北角區內難得嘅高質西餐廳，大廚更係五星級酒店出身，煮開正宗西餐，但最近應老細要求，新推出咗一個港式嘅焗豬扒飯！不過雖然係咁，但依然堅持用靚料，選用厚切美國豬肉眼扒，配搭意大利芝士、自家製嘅番茄醬等製作，口感鬆軟多汁。
Top Blade Steak Lab 牛扒專門店➡️糖水
圖：餐廳網站
以主打牛扒同任食薯條而深受歡迎嘅餐廳，最新宣佈決定開多條副線（研香）賣糖水，希望可以為港人喺苦中帶嚟一點甜。佢哋喺Facebook表示，除咗用阿媽嘅祖傳配方，亦特地邀請咗五星級大廚幫手做顧問。暫時選擇有腰果露、絲襪杏仁茶、同合桃露等，其中芝麻糊用上8個鐘慢磨製作；又選用意大利開心果製作開心果露。三十零蚊碗幾親民，不過暫時只得沙田/火炭同屯門有得團購 (詳情按此) 。
JK Brother's 日韓火鍋放題➡️平價西日韓料理
圖：本身食放題嘅餐廳，見生意難做，就要放題轉做料理，仲要賣到超平，好似韓式辣味蒜蓉包只賣10蚊，4隻雞翼或4件Tiramisu蛋糕仔都係$20。另外有脆卜卜嘅三重芝士炸雞、足料鰻魚pizza、加埋鹹蛋黃嘅西多士等等，想食得平平地又唔太高要求嘅可以考慮下。
Fireside 大廚上門服務
唔想餐餐食外賣又唔想自己煮嘅話，仲有多個選擇，就係搵個大廚上門煮。中環呢間以直火烹飪手法作招徠嘅餐廳，除咗推出到會套餐外，更連大廚都可送上門，即席嚟一餐「在家Omakase」，想試嘅朋友仔上返餐廳網站查詢預約就可以。
文：Kar
