香港嘅艇仔粉幾乎絕跡，自政府停發水上小販牌照後，全港至今只剩低2艘粉艇，而其中一艘就係出沒喺香港仔同鴨脷洲水域交界嘅「流記艇仔粉」。最近粉艇傳出好消息，負責人於社交平台公布由艇仔搬上大船並迎來新改變，開飯仔一於親身到訪睇吓有咩唔同！
逾40年艇仔粉固定停泊 由假日限定變成做足六日
艇仔粉店主流叔1981年開始做艇仔粉，年近70歲但依然堅持親自掌舵兼包辦煮粉、斬料、招呼客人等。以前嘅流記艇仔粉係假日限定，會「游走」喺香港仔同鴨脷洲沿岸，食客要現場留意艇仔粉嘅蹤影，或者致電流叔查詢位置先食到，一般下午4點賣晒就收檔。
流叔做足43年，表示依然熱愛自己做緊嘅工作
不過經營超過40年嘅粉艇有新發展，由原來嘅小艇仔搬到靠岸嘅一艘大船，並固定停泊。開飯仔於正式開業後親身到場實試體驗，見到岸上擺有招牌同搭有木橋，食客只要沿木橋走就到落單區，落單後亦可以到旁邊船隻堂食。體驗同以往比較截然不同，相比要喺岸邊向艇上嘅流叔大叫菜式、買完要到岸上自己搵位食無疑更為方便，卻同時缺少幾分風味。不過而家逢星期一、三至日9am至11pm都會營業，令更多人有機會食到。
沿住香港仔海濱花園往天光墟漁人碼頭方向，就會見到新船位置
雖然流叔一直喺廚房默默烹煮食客order，但仍會不時現身同熟客閒聊，性格友善隨和。流叔表示：「而家我喺度唔係一日做到黑嘅，我70歲退休㗎啦，但等師傳熟手咗先，多人嗰陣咪幫吓手，唔多人咪畀啲師父做囉。」
船身畫有塗鴉風店名，感覺好新鮮
唔只燒味艇仔粉！
搬上新船後，常駐款式除咗供應名物燒味艇仔粉，仲新增咗糯米飯同埋鹹豬骨雞粥。流叔解釋：「呢啲以前自己有煮開嘅，後來停咗一排冇煮，而家搬新船又煮返。」
現供應3款食物，都係船上即叫即製
招牌艇仔粉主要以燒味搭配自選粉麵，湯底一律為自家熬製嘅大地魚乾海鮮湯，雖然稱唔上為奢華美食，但就係簡單嘅地道風味。 至於燒味均由香港仔市場入貨，客人可揀燒味款式，包括叉燒、燒鴨、白切雞等，想食豪啲亦可加$20升級鴨髀或雞髀。
不論單拼或雙拼艇仔粉均賣$40/碗，開飯仔揀咗叉燒燒鴨雙拼瀨粉
叉燒同燒鴨未到啖啖肉，味道正常發揮；瀨粉吸飽湯汁好惹味
鹹豬骨雞粥為船上自家熬製，加入皮蛋、陳皮、薑絲、豬骨等食材慢火煲成。入口明顯食到粥底有陣陣陳皮香氣，整體口感綿密順滑。臘腸糯米飯味道中規中矩，勝在煙韌有咬口，硬度適中而且調味啱啱好。
鹹豬骨雞粥（$40/碗）味道格外鹹香
臘腸糯米飯（$40/碗）加入臘腸粒、蝦米仔、冬菇粒同香蔥
流記香港仔艇仔粉
地址：香港仔香港仔海傍道香港仔海濱公園
文：Sharon
編：Cathy
相、片：Yan Yan
剪：Tony
