香港米芝蓮2018！新上榜餐廳介紹返

香港米芝蓮2018啱啱新鮮出爐，三星、兩星榜變動唔多，而一星嘅就有8間餐廳首次入圍；街頭小食店方面，亦有3間新上榜呀，恭喜晒恭喜晒！即刻逐間同大家介紹下呢11間餐廳先！

新上榜一星餐廳！

澳洲主廚炮製摩登歐陸菜　Arcane

位於中環嘅Arcane餐廳，由英籍澳洲主廚Shane Osborn主理，用時令食材炮製出摩登歐洲菜式，加上開放式廚房，令食客除咗品嚐菜式味道，仲觀賞廚師們為客人料理嘅過程，好似一場表演咁，難怪今年可成功奪星。

新加坡過江猛龍　御寶軒

來自新加坡嘅御寶軒，今年年頭先進駐香港開店，話咁快就奪星，勢頭好厲害。當然啦，餐廳坐擁維港兩岸嘅海景，食之前就已經視覺大加分。食物方面有招牌脆米海鮮浸東星、法式蟹蓋等心機粵菜。餐廳啱啱喺銅鑼灣開分店添！

精緻懷石料理　Kaiseki Den by Saotome

餐廳主打高級懷石料理，由大廚Hiroyuki Saotome發辦，炮製好味嘅omakase。Omakase非常考驗大廚對不同食材配搭、烹調嘅掌握度，所以今次奪星，可以話係對Santome先生嘅肯定。拿手菜式有黑松露海膽飯、魚翅撈飯、魚翅燉蛋、炭烤鹿兒島和牛等等。

世界級名廚主理　Rech

喺摩納哥、紐約、巴黎都有米芝蓮星級餐廳嘅世界名廚Alain DUCASSE，再一次又輕鬆奪得米芝蓮一星。餐廳總店設於巴黎，係當地著名嘅海鮮餐廳，而香港店成為餐廳首間海外分店，並進駐香港洲際酒店。食客們均讚不絕口，正所謂「名廚出手，便知有沒有」，難得喺香港都可以食到世界名廚嘅手藝，梗係要捧場下啦！

精緻日、法Fusion菜 Tate Dining Room & Bar

佢哋已經連續獲得一星幾年㗎喇，今年搬咗去同區更大嘅舖位。新舖繼續都係提供日、法fusion菜式，仲有素菜餐單揀添。賣相精緻，配搭相當新鮮，例如麵包配腐乳牛油、北海道帶子就配綠茶牛油汁咁，創造咗好多唔同嘅可能性。

藍白格調海鮮主題 The Ocean

呢間喺淺水灣嘅高級餐廳，以海洋做主題，藍白格調嘅裝修，落地玻璃仲要望住無敵淺水灣海景，淨係用餐環境已經先勝一籌。由知名法國主廚Olivier BELLIN主理，menu不時都會轉換，但都係以時令海鮮入饌，好似大蝦、海膽、帶子等等，不時不食。

圖：餐廳網站

水準傳統點心 怡東軒

位於怡東酒店入面嘅中菜餐廳，傳統與創新嘅菜式共冶一爐。好似「雙生金魚餃伴鮑魚燒賣」，就令平凡嘅點心變成豪華嘅享受，其中一粒金魚餃仲加入咗黑松露添，另一道著名菜式梨釀鰒鱆烤肉，用五花腩再加鱆魚、薑葱燒，入味之餘口感亦豐富。

圖：gemini_moffatts、餐廳提供

開業僅三月便獲星 營致會館

由米芝蓮星級粵菜總廚蕭顯志師傅主理嘅粵菜餐廳，開業只係短短三個幾月，就登上一星嘅位置。招牌菜貴妃雞嘅皮夠香脆，雞肉嫩滑。點心都好精緻，好似松露雜菜粿就釀入咗3種菇菌同紅菜頭，配埋黑松露醬，清新惹味。而餐廳為咗慶祝上榜，一連兩日仲會送杯香檳畀每位食客添~

圖：colabear、餐廳Facebook

新上榜街頭小食店！

夠地道港式風味　文記車仔麵

通常車仔麵店感覺「佬味」甚濃，而且較為地踎，但呢間文記車仔麵卻好新淨，好啱一個人開飯！車仔麵款多、食材多，大把選擇。推介牛肚、牛腩、牛柏葉，夠香夠爽口，加埋秘製辣汁仲正呀！除咗車仔麵，瑞士雞翼亦非常出名架，雞翼皮吸晒瑞士汁嘅精華，內裏雞肉依然嫩滑，諗起都想食！

元朗食「雞」小店　Fork Eat

小店講求organic，主打自家農場鮮雞。培育嘅農舍雞以天然粟米繁殖，無任何激素、動物脂肪及人工色素，保證夠晒安全！舖頭接收鮮雞後，以鮮雞湯再真空慢煮，令雞肉非常嫩滑，仲好有「雞」味，味道明顯同一般嘅不同，雞皮薄而爽口，雞肉好滑。買雞嘅客人仲有店子自製嘅雞汁，好食！

米芝蓮也愛梳乎厘　I Love You Dessert Bar

米芝蓮評判們似乎聽到我哋對梳乎厘班戟嘅熱愛，所以呢間主打梳乎厘班戟嘅I Love You Dessert都榜上有名，呢度嘅梳乎厘班戟味道真係好多好多好多，紫薯榴槤檸檬草莓藍莓吉士蜜瓜樣樣有。雖然舖頭不大，但勝在味道一流！（開飯仔，講完我都想去食添！）

文：Joy、Kar